Өфөлә бындай турнир беренсе тапҡыр үткәрелә

10 октябрҙә Өфөлә Башҡортостан Башлығы Радий Хәбиров һәм Рәсәй спорт министрының беренсе урынбаҫары Одес Байсултанов республикала падел-теннис буйынса беренсе һөнәри турнирҙы тантаналы асыу сараһында ҡатнашты.

Ярыштар Башҡортостанда был спорт төрө өсөн махсуслаштырылған беренсе үҙәктә - “Арена” падел-клубының кортында үткәрелә. Ике мең квадрат метрҙан ашыу майҙанда халыҡ-ара стандартлы биш асыҡ корт һәм падел өсөн кәрәк-яраҡтар, спорт экипировкалауы, кафе, сисенеп кейенеү урыны, функциональ тренинг зонаһы һәм башҡалар бар.

Рәсәй Падел федерацияһы генераль директоры Алексей Сорокиндың әйтеүенсә, был спорт төрө - динамикалы команда уйыны.

- Рәсәйҙең 60 төбәгендә падел буйынса урындағы федерациялар бар. Беҙ Рәсәйҙең Спорт министрлығынан аккредитациялау үттек, Рәсәй Кубогы һөҙөмтәләре буйынса йыйылма команданы туплау хоҡуғына өлгәштек. Ярыштар системаһы тулыһынса бар, - тине Алексей Сорокин.

Радий Хәбиров һәм Одес Байсултанов символ төймәһенә баҫып турнирға старт бирҙе. Башҡортостан Башлығы был спорт төрө менән шөғөлләнгән балалар ракеткаһына ҡултамға ҡалдырҙы.

Сығанаҡ, фотолар: Башҡортостан Башлығы сайты.