Афарин, "Ағиҙел" ҡыҙҙары!

Бөгөн Башҡортостан Башлығы Радий Хәбиров аҙналыҡ оператив кәңәшмәне күңелле ваҡиғанан башланы. Ул Өфөнөң “Ағиҙел” командаһын Ҡатын-ҡыҙҙар хоккей лигаһы кубогын яулауы менән ҡотланы һәм спортсыларға һәм тренерҙар штабына дәүләт наградаларын тапшырҙы.

Хәтерегеҙгә төшөрәбеҙ, уҙған аҙнала “Ағиҙел” хоккейсылары плей-офта финал серияһының дүртенсе матчында Мәскәү өлкәһенең Воскресенк ҡалаһынан “Торнадо” командаһын еңеп, етенсе тапҡыр Рәсәй чемпионы һәм алтынсы тапҡыр ЖХЛ кубогын яуланы.

– Беҙҙең ҡыҙҙарға афарин! Был беҙҙең өсөн лайыҡлы һәм бик мөһим еңеү, – тине Радий Хәбиров.

Команда вәкилдәре, үҙ сиратында, республика етәкселегенә ярҙам һәм яҡшы шарттарҙа күнекмәләр үткәреү мөмкинлеге булдырылыуы өсөн рәхмәт белдерҙе.

Фото: Башҡортостан Башлығы сайты.