Тәжрибәле автоһәүәҫкәрҙәр белә: ҡыш еттеме, яғыулыҡ күберәк тотонола башлай. Быға двигателде, салонды йылытыу, төрлө электр йылытҡыстары эшләүе, хатта юлдар торошо ла йоғонто яһай. Баҡһаң, дөрөҫ итеп эшләгәндә, яғыулыҡ сығымдарын кәметеүгә өлгәшеп була икән.
Беренсенән, сығымды кәметеү өсөн двигателде оҙаҡ ваҡыт йылытмағыҙ – кузовтан ҡар таҙартҡан ваҡыт етә. Шул уҡ ваҡытта хәрәкәтте башлау менән ҡапыл тиҙлек йыймағыҙ.
Икенсенән, кузовта булған бөтә ҡарҙы ла таҙартып төшөрөгөҙ, шулай итһәң, автомобиль еңелерәк була һәм һауаның ҡаршылығы кәмей.
Тағы бер кәңәш – шиналағы һауа баҫымын даими тикшереп тороғоҙ, һалҡын ваҡытта ул түбәнәйә. Түбән баҫым шыуып барыуға ҡаршылыҡ килтерә һәм яғыулыҡ тотоноу арта.
Йәбешкәклеге кәмерәк булған мотор майын файҙаланыу ыңғай һөҙөмтә бирәсәк. Шулай уҡ автоюрған менән ҡулланыу ҙа яғыулыҡ экономиялауҙа ярҙам итә, сөнки ул йылытыуҙы тиҙләтә һәм ҡыҫҡа ваҡытҡа туҡтағанда моторға һыуынып өлгөрөргә бирмәй.
Ҡышын автомобилдән артыҡ нәмәләрҙе алып ҡуйығыҙ. Мәҫәлән, тотонмайһығыҙ икән, ҡыйыҡтағы багажникты алып тороғоҙ. Һуңғы кәңәш иһә йөрөтөү манераһына ҡағыла. Талғын, буксовать итмәй һәм кәрәкмәгән урында тиҙлекте арттырмай ғына йөрөһәң, яғыулыҡ та оҙаҡҡараҡ етәсәк.