Тел өйрәнеү – һәр ваҡыт көнүҙәк

Дәүләт Йыйылышы – Ҡоролтай йор­тоноң фойеһында бай йөкмәткеле күргәҙмә ойошторолдо. Ҡунаҡтар айырыуса Өфө Тарих, тел һәм әҙәбиәт инсти­тутының ҡулъяҙмалар фонды, Өфө федераль тикшеренеүҙәр үҙә­ге­нең ғилми архивы, Рәсәй Фәндәр акаде­мияһы Өфө ғилми үҙәге китапханаһы күргәҙмәһе янында күп ине.

Пленар ултырышта телмәр тотҡан Өфө федераль тикшеренеүҙәр үҙәге Тарих, тел һәм әҙәбиәт институтының профессоры, география фәндәре докторы Айбулат Псәнчин Рәсәй Фән һәм юғары белем биреү министрлығының ҡотлау хатын уҡып ишеттерҙе.

– Бөгөнгө сара башҡорт телен өйрәнеү йүнәлешендә ҙур һәм һөҙөмтәле майҙансыҡ булырына ышанам, – тине Башҡортостан Башлығы идаралығының милли сәйәсәтте тормошҡа ашырыу буйынса бүлеге советнигы Гөлсәсәк Мөхәмәтйәнова. – Беҙҙә алып барылған тел сәйәсәте тотош илебеҙҙә хуплау тапты. Республика етәксеһенең Указына ярашлы яңы йүнәлештәр билдәләнде, төрлө программалар уңышлы тормошҡа ашырыла. Башҡортостан Башлығы Гранты, башҡорт телен һаҡлау һәм үҫтереү фонды, башҡорт теленән диктант, Башҡорт теле һәм әҙәбиәте уҡы­тыусыларының I Бөтә Рәсәй съезы, күрше өлкәләрҙә үткән башҡорт мәҙәниәте һәм мәғарифы көндәре – шуға миҫал.

Дәүләт Йыйылышы – Ҡоролтай депутаты, филология фәндәре кандидаты Зәки Әлибаев конференцияның исеменең уңышлы һайланыуына баҫым яһаны һәм былай тине:

– Башҡорт теле “Урал батыр” эпосынан башланған. Туған тел – ул ҙур байлыҡ. Мәҫәлән, тарихты байҡаһаҡ, арҙаҡлылар Салауат Юлаев, Мифтахетдин Аҡмулла, Шәйехзада Бабич туған телебеҙҙә халыҡҡа мөрәжәғәт иткән. Мәғрифәтсенең “Башҡорттарым, уҡыу кәрәк, уҡыу кәрәк!” тигән һүҙҙәре һәр заманда ла актуаль. Бөйөк Мостай Кәримдең тыуыуына 100 йыл тулыу уңайынан уҙған сараларҙа шағирҙың шиғырҙарын башҡортса һөйләнек.

Зәки Арыҫлан улы, башҡорт телен дәүләт һәм туған тел булараҡ уҡытыуҙа башҡорт теле уҡытыусыларының өлөшө баһалап бөткөһөҙ, был йәһәттән китаптар һәм әсбаптар етерлек, тип билдәләне. Башҡорт телен өйрәнеү эшен балалар баҡсаһынан алып юғары уҡыу йорттарына тиклем башҡарырға бурыслыбыҙ.

Башҡортостан Мәғариф министрлы­ғының идаралыҡ начальнигы Булат Зиннуров, профессор Айтуған Аҡманов, тарих фәндәре докторы Марина Мартынова һәм башҡаларҙың сығыштары ла фәһемле, мәғлүмәтле булды.