100 йәшегеҙ менән, Сәтиғә Сәйетгәрәй ҡыҙы!

Нефтекама ҡалаһы хакимиәте башлығы Эльдар Вәлидов социаль селтәрҙәге сәхифәһендә ҡыуаныслы ваҡиға тураһында яҙған - Сәтиғә Сәйетгәрәй ҡыҙы Ғәзизоваға 100 йәш тулған. Етәксе уны оло юбилейы менән ҡотлаған.

Сәтиғә Сәйетгәрәй ҡыҙы ваҡиғаларға бай оҙон ғүмер кисергән. Быуат дауамында тарихтың төрлө үҙгәрештәренә шаһит булған. Ҡала округы инфраструктураһын булдырыуға һәм үҫтереүгә үҙ өлөшөн индергән, Ҡарман электр станцияһын төҙөүҙә ҡатнашҡан.

"Бөгөн Сәтиғә Ғәзизова үҙенең ғүмер байрамын балалары, ейән-ейәнсәрҙәре, бүлә-бүләсәрҙәре менән ҡаршы алды. Ситтә ҡалманыҡ, ағинәйҙе юбилейы уңайынан ҡотларға ашыҡтыҡ. Был байрамдың Хеҙмәт ветераны көнөнә тап килеүе символик мәғәнәгә эйә.

Ысын күңелдән тыуған көнөгөҙ менән ҡотлап, бәхет, сәләмәтлек, оҙон ғүмер теләйем. Яҡындарығыҙ һәр ваҡыт йылылыҡ, хәстәрлек менән уратып алһын. Юбилейығыҙ менән!" – тип яҙған Эльдар Вәлидов социаль селтәрҙәге сәхифәһенә.

Йөҙйәшәр инәйҙең әле лә бик матур йырлауы ла һоҡланғыс! Уға артабан да һаулыҡ-сәләмәтлек юлдаш булһын, балалары янында ҡәҙер-хөрмәттә йәшәһен!

Видеояҙма, фотолар Эльдар Вәлидовтың сәхифәһенән.