Китә беҙҙән, китә һалдаттар...

Мөхәмәтулли Вәлиуллинға 104 йәш тулған булған. Ҡайғылы хәбәр менән ҡала хакиәмиәте башлығы Эльдар Вәлитов үҙенең социаль селтәрҙәрҙәге сәхифәһендә хәбәр итте.

Мөхәмәтулла Ғәтиәт улы Вәлиуллин – Бөйөк Ватан һуғышы ветераны. Һуғышҡа тиклем Краснокама районының Ҡарман ауылында йәшәй. Ауыл тормошо уны сыныҡтыра, шуға 1939 йылда хәрби хеҙмәткә алынғас, ул артыҡ ауырлыҡ кисермәй. “Буйым ғына бәләкәй булды, 158 сантиметр, шулай ҙа сыҙам булдым”, - тип һөйләй ине ветеран.

Хәрби хеҙмәтте ул Бессарабияла, Румыния сигендә үтә. Ул ваҡытта уҡ Европа буйлап фашизм шәүләһе атлай. 40-сы йылдарҙа фашистар Румынияға үтеп инә. Шунда уҡ һуғыш башланырын аңлай улар.

1941 йылдың 22 июне тураһында һөйләгәйне ветеран. “Икенсе яҡтан геүелдәгән тауыш көсәйгәндән-көсәйҙе, баш осонда снарядтар шартлай башланы. Таңғы бишкә авиация беҙҙең подразделениеларҙы тулыһынса утҡа тотто. “Мессерҙар” болот булып СССР сигенә юлланды. Ә минең башта бер уй: заставаны ҡалдырырға приказ булманы! Иҫән ҡаламмы-юҡмы?”

Ветеран бер нисә тапҡыр ҡаты яралана. Күрһәткән батырлыҡтары өсөн орден-миҙалдар менән наградлана.

Бөйөк Еңеүҙе Праганан 20 километр алыҫлыҡта ҡаршылай. Тыуған яҡтарына 1946 йылдың авгусында ғына ҡайта. Шунда уҡ Мәғәфиә исемле уңған ҡыҙға өйләнә. Уларҙың ун балаһы донъяға килә. Ике балалары бәләкәй саҡта вафат була. Әле ветерандың 16 ейәне, 26 бүлә-бүләсәһе бар.

Ҡарман ауылынан 580 ир-егет фронтҡа китә, шуларҙың 280-е һуғыштан әйләнеп ҡайта. Ир-егеттәр етмәй. Колхозда эш күп була. Хаҡлы ялға тиклем ветеран туған колхозында эшләй.

Йөҙйәшәр үҙенең бер интервьюһында сәәмәтлек серҙәре менән уртаҡлаша: иртә торорға, күнекмәләр эшләргә, йүгерергә, йәйәү йөрөргә, араҡы эсмәҫкә, тәмәке тартмаҫҡа кәрәк. Үҙе һәр саҡ сәләмәт тормош яҡлы була ул.

Ветерандың балалары һәм ейән-ейәнсәрҙәренең ҡайғыһын уртаҡлашабыҙ.

Фотолар “Красное знамя” гәзите архивынан алынды.