Һайлаған һөнәренә тоғро

8 апрель – Хәрби комиссариат хеҙмәткәрҙәре көнө.

Бал ҡорттары нисек тырышып умартаға бал ташыһа, гүзәл заттарыбыҙ ҙа шуның шикелле йорттарында усаҡ йылыһын һаҡлауҙы үҙҙәренә маҡсат итеп ҡуйған. Уларҙың һәр береһе ныҡышмал, сәмсел һәм бөтмөр. Шул уҡ ваҡытта дәүләт эштәренә лә өлгөрә. Шундай уңғандарҙың береһе – Алина Семенова менән таныштыҡ.

– Иртән уянғас та һәр таң­дың атыуына ҡыуанысым сикһеҙ, тормоштоң матурлығы алға әйҙәй, – тип башланы һүҙен Өфө ҡа­лаһы Октябрь һәм Совет райондарының хәрби комиссариаты белгесе Алина Фәнзил ҡыҙы. – Шатлығым тағы ла шуның ме­нән бәйле – яратҡан эшем бар, тиккә ге­нә йортона аш­ҡы­нып ҡайтҡан, эшенә теләп барған кешене бәхетлегә тиңлә­мәй­ҙәр. Әгәр ҙә улай түгел икән, бында бер көн дә түҙмәгән булыр инем. Ҡағыҙ­ҙар менән эш итеүе һис кенә лә ялҡытмай, ки­реһенсә, ҡы­ҙыҡ­һыныуым артҡандан-арта.

Төрлө ҡағыҙҙарға күмелеп ултыр­ған һылыуҡайҙың эше нимә­нән ғибәрәт? Ил алдындағы изге бурысты үтәп ҡайтҡан егеттәрҙе иҫәпкә ҡуйыу – уның төп бурысы. Рәсми телдә иһә запасҡа ҡайтарыл­ған граждандарҙы теркәү тип атала. Минең аңлауымса, исем-шәрифен, йәшәгән ерен һәм эш урынын яҙҙың да шуның менән вәссәләм. Баҡти­һәң, ул уға ҡарағанда ла “тәрәнерәк” икән. Әйтәйек, кемдер хеҙмәт урынын алмаштырҙы ти, уның тураһында мәғлүмәтте шунда уҡ үҙгәртеү фарыз.

Алина Семенова билдә­лә­үенсә, бында һәр саҡ теүәллек кәрәк, иртәгәһен ишәк ҡайғырт­ҡан тип йәшәү йәки бөгөнгө бурысты киләһе көндәргә ҡалдырыу тигән принцип төптө хата. Өҫтәүенә документ­тағы имза һәм мисәт кеүек мөһим әйбер­ҙәргә иң беренсе иғтибар итергә тейешһең.

– Ғаиләмдән дә уңдым – быныһы инде тор­мошомда иң мөһиме, – тип дауам итә һүҙен Алина Фәнзил ҡыҙы. – Александр Александрович менән, ул минең ирем, ике балаға ғүмер бирҙек. 11 йәшлек Эвелина ҡыҙым – әхирәтем дә, серҙәшем дә, ярҙамсым да. Дүрт йәшлек Александр улыбыҙ балалар баҡсаһына йөрөй, бынан тыш, ир-егеттәргә хас һаналған бокс, көрәш кеүек спорт секцияларын ҡалдырмай. Ата­һы әйтмешләй, ысын ир-егет һәм ил һаҡ­сыһы әҙерләйбеҙ. Әлбиттә, төрлө хәйләле юлдар аша әрменән ҡасып йөрөгән үҫмер­ҙәрҙе аңламайым да, ихтирамым да юҡ.

Алина Фәнзил ҡыҙы – Өфө ҡыҙы. Баш ҡаланың 17-се мәктәбендә уҡыған, унан инде Эске эштәр министрлығының Өфө юғары мәктәбен (хәҙер – институт) тамам­лағандан һуң тура хәрби комис­сариатҡа эшкә килгән. Әйткәндәй, уның атаһы ла – хәрби кеше.

Уның кабинетынан сығып баҫ­ҡыс буйлап беренсе ҡатҡа төшөп барғанда Рима Ғәҙелшинаны осраттыҡ. Ул да коллегаһы тура­һында бер нисә һүҙ әйтеүҙе урынлы һананы. Рима Рәйес ҡыҙы белде­реүенсә, етәкселек Алинаны эшкә алып ныҡ отҡан, уның шикелле грамоталы йәнә бер-ике белгес булғанда тау аҡтарырға мөмкин.