Һикһән йәштә лә – йәштәрсә

Ошо көндәрҙә Баймаҡ районының Иҫке Сибай ауылында йәшәгән ағинәйҙәрҙең береһе Разия Баймөхәмәтова үҙенең 80 йәшлек олпат юбилейын билдәләне. Бар ғүмерен йәш быуынға белем биреүгә бағышлаған инәй әле лә үҙенең мөғәллимәлек эшен ташламай. Дин юлын өйрәнеүселәргә ислам серҙәрен өйрәтә, Ҡөрьән дәрестәренән һабаҡ бирә.

Ҡот ҡойоу, мейе төшөрөү, балаларҙы имләү кеүек им-том шөғөлө уға бәләкәйҙән әсәһенән бирелгән. Шулай уҡ шифалы үләндәр йыйыу, уның менән дауалау алымдарын да ауылдаштарына өйрәтә.

Оло йәштә булыуына ҡарамаҫтан, Иҫке Сибай ағинәйе бөгөн дә йәштәргә үрнәк булырлыҡ донъя көтә, тирә-яҡҡа изгелек өләшә.