“Өс меңдән ашыу кешегә ярҙам итергә ниәт бар”

Былтыр республикала торлаҡты сафҡа индереү ете процентҡа кәмеп, 2,3 миллион квадрат метр тәшкил иткән. Парламент ултырышында төбәк етәксеһе Радий Хәбиров ошондай мәғлүмәтте телгә алды.

– 2024 йылға торлаҡ төҙөү күләмен 1,6 тапҡырға арттырыу бурысы тора, – тине ул.

Шул уҡ ваҡытта 13 төҙөлөш компанияһы бөлгөнлөккә төшөү арҡаһында күп фатирлы 90 йорт проблемалы тип танылды, ете меңдән ашыу граждан зыян күрҙе.

– Мәсьәләне хәл итеү өсөн “Төҙөлөш сәғәте” тәртибендә кәңәшмәләр үткәрелә. Уларҙа өлөшсөләрҙең инициативалы төркөмдәре лә ҡатнаша. Былтыр проблемалы 19 йорт төҙөлөшө тамамланды. 900-ҙән ашыу кеше өй туйланы. Быйыл тағы ла 51 проблемалы йортто файҙаланыуға тапшырып, өс меңдән ашыу кешегә ярҙам итергә ниәтләйбеҙ, – тине Радий Хәбиров.