Сибай урамдары яҡтыра

Сибай ҡалаһы хакимиәтенең сәнәғәт, төҙөлөш, транспорт һәм элемтә бүлеге етәксеһе Светлана Токмакова әйтеүенсә, программаға ярашлы, ҡаланы яҡтыртыуға республика бюджетынан кәрәкле сумманың 90 проценты бүленәсәк. Ҡалған 10 процентты муниципалитет хәстәрләй. Әле урындағы хакимиәт Башҡортостандың Торлаҡ-коммуналь хужалыҡ министрлығы менән был сараларҙы тормошҡа ашырыу өсөн субсидия алыуға килешеү төҙөгән.

Быйыл ҡалала 679 яҡтылыҡ нөктәһе һәм бағаналар ҡуйыласаҡ. Эштең дөйөм хаҡы 10 миллион һумдан ашыу. Был яҡтылыҡ ҡоролмаларына дистанцияла идара итеү өсөн махсус система булдырыла.

Атап әйткәндә, әле бөтөнләй яҡтыртылмаған Төньяҡ ҡасабаһы, Арҡайымдың Дәүләт, Батыр Вәлит, Баҡыр-Үҙәк, Жуков, Рыбаков, Зәйнәб Биишева, Сөләймәнов, Өмөтбаев, Мәмбәтҡолов, Моҡас, Есенин, Көньяҡ ҡасабаһының Буранғолов, Ғәҙелша, Гәрәев, Аҡъяр, Аэропорт, Көньяҡ, Дуҫлыҡ, Парк, Сиренле, Һаҡмар, Любушкин, Ҡаҙанбаев, Ибраһимов, Ғафаров урамдарын яҡтыртыу буйынса ҙур эштәр атҡарыласаҡ.

Подрядсы ойошма билдәләнеү менән был бурысҡа тотонасаҡтар.