Йылмайыуы ла дауа

Бөгөн Шишмә үҙәк район дауа­ха­наһы баш табибының поликлиника буйынса баш табип урынбаҫары ва­зи­фаһын башҡарған Венера Самат ҡыҙы ҡояшлы Үзбәкстанда тыуған. Ба­ла сағы ла, йәшлек йылдары ла ошо төбәктә үтә. Ташкент дәүләт медицина институтын тамамлап, ҡу­лына табип дипло­мы алған ҡыҙҙы яҙмыш юлы Баш­ҡорт­остандың Шишмә районына илтә. Участка терапевы булып эшлә­гән һылыу тырышлығы, асыҡ йөҙлө­лө­гө, яғымлы тауышы менән пациенттар араһында хөрмәт ҡаҙана. Сер түгел: ҡайһы бер табиптарҙан сыҡҡас, нимә тип әйтте әле, нисеге­рәк дауаланырға икән, тип баш ҡа­тыраһың. Икенселәре кәйефеңде ҡырырға ла күп һорамай. Ә Венера Самат ҡыҙы һис йыбанмай: ауырыу­ҙарға диагнозын ябай, аңлайышлы итеп төшөндөрөп бирә, нисек туҡла­нырға, нимәләрҙе сикләргә кәрәкле­ген аңлата. Тап шуға ла районда нәҡ уға эләгергә теләгәндәр арта. “Беҙҙең Венера Самат ҡыҙының йылмайыуы ла дауа”, – тиҙәр уның хаҡында.

Ошонда үҙенең ғүмер юлдашын да осрата Венера. Бөгөн ул – өс ба­ла әсәһе. Өлкән улы Тимур инженер булһа, ҡыҙы Гөлфиә әсәһенең юлын һайлаған – табип. Кинйәләре Хәмит иһә – Башҡорт дәүләт педагогия университеты студенты. Улар әсәһен уңыштары менән ҡыуандырып тора.

Йылдар үтә. Һәр йәһәттән өлгөлө ханымды баш табиптың поликлиника буйынса урынбаҫары итеп үрлә­тәләр. Был яуаплы бурысты башҡа­рыуға ла көсөн йәлләмәй ул. Район халҡын диспансерлаштырыуға, ауырыуҙар­ҙан иҫкәртеүгә ҙур тырышлыҡ һала.

– Диспансерлаштырыу – комплекслы сара, бер нисә белгес халыҡтың һаулығын ентекле тик­шерә, – ти табип. – Ул туберкулез, онкология, шә­кәр диабеты, башҡа хроник ауырыу­ҙарҙы ваҡытында асыҡларға ярҙам итә. Файҙаһы, һис шикһеҙ, ҙур. Күптән түгел бер ханым килде. Ҡарап тороу­ға һау-сәләмәт кеше, үҙе лә бер нәмәгә зарланмай. Тикшереү барышында яман шеш барлығы асыҡ­ланды. Ярай әле тәүге стадия ине.

Үкенескә ҡаршы, күптәрҙең үҙ һаулығына битараф булыуы борсой Венера Самат ҡыҙын.

– Ҡайһы берәүҙәр ауырып йығыл­ғас ҡына килә, – ти ул. – Ә бит ғүмер бер генә. Күп осраҡта һуң булыуы ла бар.

Буш ваҡыттарын Венера Самат ҡыҙы файҙалы һәм күңелле итеп үткәрергә тырыша. Уны театрҙарҙа, кон­церттарҙа йыш күрергә була, әҙәби китаптар уҡырға әүәҫ.

– Бында килгәс, Башҡортостандың тәбиғәте иҫ киткес матур булыуына һоҡландым, – ти юғары категориялы табип. – Айырыуса таулы район­дар­ға сәйәхәт итергә яратам. Унда үҙемә еңеллек алам, арыу-талыуҙарым онотола.

...Шишмә ҡасабаһы буйлап урта йәштәрҙәге бер ханым килә. Бында йәшәгәндәрҙең күбеһе таный уны һәм ҙур хөрмәт менән һаулыҡ һораша. Әҙәм балаһы өсөн ошонан да ҙурыраҡ бәхет юҡтыр.

Шишмә районы.