Дауаханала ҡалдырған улымды эҙләйем!

Киноның төп геройҙарының береһе Айһылыу – Эльмира Юлдашеваны халыҡ айырыуса йылы ҡабул итте. Уның өсөн борсолдо, шатлыҡтары булһа, ҡыуанды. "Ай ҡыҙы" бөгөн үҙе – өс бала әсәһе. Игеҙәктәре Нурислам менән Нуриҙәгә – 16 йәш. Егет Өфө автотранспорт колледжында белем алһа, һылыу – кооператив техникум студенты. Ә Динисламға тиҙҙән 11 йәш тула.

– Киноға төшкән ваҡыттарҙы һағынып иҫкә алам. Асы халҡы ҡунаҡсыл, ихлас булып хәтерҙә ҡалған. Тағы шуныһы – мин кинола "әсәй" булдым. Өфөнөң 4-се бала табыу йортонда миңә бер малайҙы биреп торҙолар. Ошо ҡыҫҡа ғына ваҡытта шул бәпесте ныҡ яратып өлгөрҙөм, үҙемдеке һымаҡ ҡабул иттем. Хатта һуңынан уны ҡалдырып киткәс, күңелгә ҡыйын булып торҙо, – тип

хәтирәләргә бирелде артист. – Хәҙер үҙем өс бала тәрбиәләһәм дә, шул “балам”ды һаман онота алмайым, күрһәм, ҡыҫып-ҡыҫып яратыр инем. Бәлки, гәзит уҡыусылар уны табышырға ярҙам итер...