Шина шартлап, водитель йәрәхәтләнгән

39 йәшлек ир «КамАЗ»да асфальт ташыған. Сираттағы рейс мәлендә машинаның артҡы тәгәрмәсе тишелгән. Водитель йөктө бушатҡан һәм предприятиеның гараж боксына юл тотҡан, шиналар монтажлау оҫтаханаһында тәгәрмәсте һүткән, бортын айырған, камераны алмаштырған һәм компрессор ярҙамында һауа тултырған. Унан һуң ул тәгәрмәсте этеп сығарып һөйәгән һәм баҫымды тикшерергә булған. Шул мәлдә шина эсендәге камера шартлаған һәм тәгәрмәс водитель яғына осҡан һәм башына бәрелгән. 22-се дауаханала табиптар уның мейеһе һелкенеүен, баш һөйәгенең күп урындан һыныуын асыҡлаған.

Дәүләт хеҙмәт инспекцияһы белдереүенсә, Совет районының муниципаль учреждениеһында хеҙмәтте һаҡлау талаптары боҙола икән. Хеҙмәткәр кәрәкле һаҡланыу саралары менән тәьмин ителмәгән, хеҙмәтте һаҡлау тураһында идара системаһы положениеһы эшләнмәгән. Бәхетһеҙ осраҡҡа эште дөрөҫ ойоштормау, махсус урындан ситтә тәгәрмәс баҫымын тикшереү кеүек сәбәптәр килтергән тип белдерәләр ведомствонан.