Бөтә яңылыҡтар
Йәмғиәт
28 Июль 2019, 23:47

Мопедта йөрөү бала саҡ хыялым ине...

Ҡыҙыҡ өсөн генә башланған эштең аҙағы бер ҙә ҡыҙыҡ түгел.

Фото: news 102
Бишбүләк районының Дим ауылынан бер ҡатын, гаражымдан мопедымды урлағандар, тип полицияға хәбәр итә. Уның һөйләүенсә, иртән тороуына гараж йоҙағын емереп алып ҡасҡандар.
Полиция хеҙмәткәрҙәре килеп гараж янынан йыраҡ түгел ерҙә мопедты һәм шлемды таба. Участковый был кемдең эше булыуын тиҙ күҙаллай һәм 14 йәшлек үҫмергә «ҡунаҡҡа» бара.
Үҫмер дәлилдәрҙе килтергәнсегә тиклем ғәйебен танымай, тик һуңынан ғына, мопедта йөрөү бала саҡ хыялым ине, шуға алғайным, ти. Алыуын – ала, тик мопедты тоҡандыра алмағас, күрше урамда ташлап китә. Ҡыҙыҡ өсөн генә башланған эштең аҙағы бер ҙә ҡыҙыҡ түгел: үҫмергә ҡарата енәйәт эше ҡуҙғатылған, был ҡылығы өсөн биш йылға тиклем төрмә янай.