Булмаған танытманан яҙмаясаҡ...

Бөгөн иртән баш ҡала урамдары буйлап ысын мәғәнәһендә автоуҙыш ойошторған иҫерек ҡыҙҙар тураһында яҙғайныҡ инде.

Өфөнөң бер төркөм гүзәл заттары, төн буйы баш ҡала барҙарының береһендә күңел асҡандан һуң, ҡала урамдарын ҡыҙырырға сыҡҡан, хәүефле ярыш ойошторған. Юлдарында хоҡуҡ һаҡлау хеҙмәткәре хасил булғас та, ҡыҙып алған ҡыҙҙар алға елдергән.

Ҡыуыш 06.40 сәғәттә Спорт һарайы янында, Audi водителе автомобилгә идара итә алмайынса, үтеп барған ВАЗ-2114 автомобиленә һуғылғас, туҡтаған.

Билдәле булыуынса, Audi-ға Ангелина Ч. исемле 21 йәшлек ҡыҙ идара иткән. Ул да, әхирәттәре лә – баш ҡаланың абруйлы юғары уҡыу йорттарының студенттары. Водителгә 12 хоҡуҡ боҙоу тураһындағы протокол төҙөлгән. Быға тиклем, иҫерек килеш рулгә ултырған өсөн уға 30 000 һум штраф һалынасағы, ҡыҙҙың танытманан 1,5 – 2 йылға ҡолаҡ ҡағасағы хаҡында яҙғайныҡ. Әммә, асыҡланыуынса, дыуамал ҡыҙҙың танытмаһы бер ваҡытта ла булмаған. Затлы автомобилде ул быйыл ғинуарҙа һатып алған һәм уның менән танытмаһыҙ идара иткән.