Пираттар өс кешене ҡулға алған

Пираттар Камерун ярҙарында йөк карабына һөжүм иткән һәм өс Рәсәй кешеһен ҡулға алған.

Әйтерһең дә, фильм сюжеты. Ә был ысынбарлыҡ. Ҡыҙғанысҡа ҡаршы, һуңғы йылдарҙа пираттарҙың Камерун һәм Нигерия ярҙарында сауҙа караптарына һөжүм итеү осраҡтары артҡандан-арта. Әле ғинуар башында ғына бер карапты ҡулға алып, унда булған 23 Рәсәй гражданын айҙан артыҡ тотҡонлоҡта тотҡайнылар.

Йома көндө “Ультрабалк” Дания компанияһының “Мармалайта” тип аталған йөк карабы Антигуа һәм Барбуды флагы аҫтында Камерундың Дуала порты янынан үтеп барғанда һөжүмгә дусар ителә. Пираттар һигеҙ экипаж ағзаһын ҡулға ала, улар араһында өс Рәсәй кешеһе лә була.

Яундалағы Рәсәй илселегенән хәбәр итеүҙәренсә, Камерун властаре һәм судно хужалары хәлде асыҡлау менән шөғөлләнә. Рәсәй дипломаттары илебеҙ граждандарын ҡотҡарыу өсөн барыһын да эшләй.