Әлдә таксист килеп сыға. Юҡһа...

Иртән иртүк Майкоп ҡалаһында йәшәгән таксист эшкә китә. Туҡталышта машинаһында ултырған шикле ирҙе күреп ҡалып, туҡтай. Ул бәләкәй ҡыҙ янында урала һәм уны автомобиленә ултырырға саҡыра. Владимир ҡыҫылырға ғына хәл иткәндә, автобус килә һәм ҡыҙсыҡ унда ултырып китә.

Был хәлдән һуң таксист тынысланып клиенты артынан китә һәм кире әйләнеп килгәндә әлеге ирҙе тағы күреп ҡала. Был юлы ул икенсе балаға бәйләнә башлаған була. 12 йәшлек ҡыҙыҡай ҡысҡырып, уның менән бер ҡайҙа ла бармаясағын әйтә, тик тегенеһе артынан автомобилендә эйәреп барыуын дауам итә. Был юлы Владимир ситтә ҡала алмай. Заказынан баш тарта ла, машинаһы менән уның юлын ҡыя һәм ҡыҙыҡайҙан нимә кәрәклеген асыҡлай башлай. Ирҙең ҡото оса, ҡапыл артҡа бирә лә, ҡаса. Ҡыҙ бала иһә таксистҡа ирҙең бәйләнеүе тураһында һөйләп бирә.

Икенсе көндө Владимирҙы ҡыҙҙың ата-әсәһе таба. Рәхмәттәр әйтеп, ярҙамы өсөн аҡса тәҡдим итә, тик ир уны алмай.

Күҙ алдына килтерегеҙ әле, әгәр таксист ярҙамға килмәһә, хәл нимә менән бөтөр ине? Әйҙәгеҙ тирә-яныбыҙҙағы кешеләргә, айырыуса бәләкәй балаларға ҡарата иғтибарлыраҡ булайыҡ.