“Көрәш һарайы барлыҡ көрәшселәр өсөн тыуған йортҡа әүерелер”

Төбәк етәксеһе Радий Хәбиров әйтеүенсә, бөгөн уның хыялы тормошҡа ашты – һоҡланғыс спорт төрөнә һәм барлыҡ тренерҙарға, көрәш ветерандарына ихтирам йөҙөнән Өфөлә Республика спорт көрәше үҙәгенең тәүге нигеҙ ташына капсула һалынды.

– Көрәш һарайы республикалағы барлыҡ көрәшселәр өсөн тыуған йортҡа әүереләсәк. Беҙ Спорт көрәше федерацияһы һәм ветерандар менән берлектә яңы үҙәк бөйөк көрәшсе һәм шәхес, башҡорт халҡының улы Владимир Алексеевич Бормандың исемен йөрөтәсәк тип ҡарар итте. Ул республикабыҙ, илебеҙҙә спорт көрәшен үҫтереүгә күп көс һалған шәхес. Ошо иҫтәлекле ваҡиға менән барығыҙҙы ла ихлас ҡотлайым, – тине Радий Хәбиров.

Уның әйтеүенсә, әле 2021 йылда республика юниорҙар араһында спорт көрәше буйынса донъя чемпионатын үткәреүгә дәғүә итә. Әлбиттә, ул ваҡытҡа үҙәкте төҙөп өлгөрмәйәсәктәр, әммә ул республикабыҙҙа үҙенсәлекле һәм бик кәрәкле спорт ҡоролмаларының береһе буласаҡ.

Рәсәйҙең Спорт көрәше федерацияһы президенты бында бөйөк чемпиондар һәм Рәсәйҙең ысын патриоттары тәрбиәләнәсәк, тип белдерҙе.

– Өфөлә һәм Башҡортостанда көрәш традициялары бик көслө тарихи тамырҙарға эйә. Йәштәргә мөрәжәғәт итеп, шуны әйтергә теләйем: бөгөн нигеҙ һалынған мөмкинлектән мотлаҡ файҙаланығыҙ, ялҡауланмағыҙ, көс-ҡеүәт туплағыҙ, – тине Дәүләт Думаһы депутаты, өс тапҡыр Олимпия чемпионы, Рәсәй геройы Александр Карелин.

Алексей Бормандың улы Владимир Борман әйтеүенсә, үҙәк – Рәсәйҙә иң ҙур көрәш һарайҙарының береһе буласаҡ, ә федерация өсөн ул баһалап бөткөһөҙ ҙур бүләк, тимәк, атаһы нигеҙ һалған йолалар республикала дауам итәсәк.