Ҡатындың үҙен үлтереп, уның машинаһында һыпырта

Енәйәтсе ҡорбанын муйынынан салып, еңел автомобилен алып ҡасҡан. Әлегә уның кемлеге билдәһеҙ, хоҡуҡ һаҡлау органдары эҙләү менән шөғөлләнә.

23 августа ҡатындың мәйетен әхирәте таба. Унда ошо фатирҙың асҡысы була. Яҡын дуҫының бәйләнешкә сыҡмағанына борсолоп килә ул. Тупһаны аша атлап инеү менән ҡан эҙҙәренә, унан әхирәтенең үле кәүҙәһенә юлыға, йорт эсенең аҫты өҫкә килтерелгән...

Үлгән ҡатын экскурсовод була. Күршеләре уның үтә баҫалҡы, тыныс холоҡло булыуын, теләһә ниндәй кешеләр менән сыуалмауын, тик туғандары, әхирәттәре менән генә аралашыуын билдәләй.

Әммә фажиғә булған кистә экскурсовод ҡатын янына яҡындарының береһе лә килмәй. Йорт алдындағы күҙәтеү камераларын тикшергәс, полиция хеҙмәткәрҙәре был фатирға таныш булмаған ирҙең ингәнен асыҡлай.

Яуыз ниәтле әҙәм ҡатынды үлтерә, фатирҙа нимәлер эҙләй, аҙаҡ кеҫә телефонын һалып ала, “Вольво” машинаһының асҡысын эләктереп, фажиғә урынынан һыпырта...