Икмәккә йөрөү йыраҡ тип... зебра һыҙырға булған

Яңы Мәскәүҙә бер ирҙе тотҡандар. Баҡһаң, ул йортонан йыраҡ түгел юл аша йәйәүлеләр үткеле – зебра һыҙып маташҡан икән. Эйе-эйе, аҡ буяу һәм щетка алған да...эшкә тотонған.

Сәбәбе: ҡаршылағы магазин юл аша урынлашҡан, ә светофорға барып еткәнсе байтаҡ атларға кәрәк, имеш. Шуға ир оҙаҡ уйлап тормаған, туранан-тура юл һалырға булған. Ошо шөғөл ваҡытында уны полицейскийҙар тотҡан да инде. “Кешеләргә яҡшылыҡ эшләйем тигәйнем”, – тип аҡланған “рәссам”.

“Был урында автомобилдәрҙең тиҙлеген яйлаусы билдә юҡ. Кешеләр аңын-тоңон төшөнмәйенсә, үткел аша барғанда, уларҙы машина бәрҙереп китеүе ихтимал”, – ти ЮХХДИ хеҙмәткәрҙәре.

Ҡыҙғанысҡа ҡаршы, хәҙер иргә тура юл урынына административ яуаплылыҡ янай, суд юлын тапап байтаҡ ваҡыты үтәсәк.

Фото: ss.metronews.ru