Ҡаланың йәшәйешенә йән өрәләр

Бының өсөн предприятие коллективы йыл әйләнәһенә фиҙакәр хеҙмәт һала. Көндө, ғәҙәттә, иртә таңдан автотранспорт цехы эшсе­ләре башлай. Цехҡа Ринат Хөсә­йенов етәкселек итә. Ҡышҡы буран­дарҙа улар хатта төнгө сәғәт 3-4-тә урамдарҙы ҡарҙан таҙартырға сыға. Йәйге осорҙа ла ҡала уянғансы эшкә керешәләр. Эшселәр Самат Әхмәҙуллин, Илгиз Ғабдуллин, Руслан Ғәлимов, Фәрит Закирйәнов, Рәфис Мәрҙәншин, Илмир Шәрипов, Рәүҙәт Аҫылгәрәев, Рөстәм Закиров, автогрейдерсылар Данис Байрамшин, Әлфир Әхмәҙиев, Радик Латипов, водителдәр Винер Куручев, Илфат Зәйнетдинов, Рәмзил Шәй­хинуров, Олег Алексеев, электр менән иретеп йәбештереүселәр Ринат Ямалетдинов, Малик Рәхимов, Фәрит Закирйәнов, Самат Әхмә­ҙуллин, Рузил Фәтхелбаянов үҙ эштәрен күңел биреп башҡара. Шундай хеҙмәткәрҙәрҙең тырышлығы менән ҡала юлдары, тротуарҙар таҙа һәм ҡараулы. Быға Энгель Ҡазыханов етәкселегендәге санитар таҙартыу бригадаһы уңғандары ла лайыҡлы өлөш индерә.

Яҙғы һәм йәйге осорҙа эш улар өсөн айырыуса мөһим. Һауа торо­шоноң ниндәй булыуына ҡара­маҫтан, улар сафта. Парктарҙа ҡала майҙандарын йәшелләндерәләр, яҙлы-көҙлө ағас, ҡыуаҡ үҫентеләре ултырталар, сәскәләр үҫтерәләр. Үткән йыл 515 төп ағас үҫентеһен, 11 мең дана сәскәне тәрбиәләп үҫтергәндәр. Рәүилә Кәримова, Илвира Ғәзизова кеүек матурлыҡ яратҡан эшселәр тупланған бри­гадаға.

Төҙөкләндереүселәр бригадаһы тураһында ла маҡтау һүҙҙәре генә ишетергә мөмкин. Фидус Ниғмә­туллин, Радик Баһманов, Илмир Басиров, Виктор Чиглинцев, Валерий Букреев, Риф Тимерйәнов, Данил Мәхийәнов, Булат Ғәлиев кеүек уңғандар эшләй унда.

Коллектив ҡала урамдарын һәр саҡ ҡунаҡ көткәндәй таҙартып тора. Ә инде предприятиеның етештереү базаһы инженерлыҡ селтәрҙәрен яңыртыу, коммуникацияларҙың төҙөк­лөгөн тәьмин итеү, капиталь ремонт эштәре өсөн яуаплы. Биҙәкләүселәр Раушания Хәкимул­лина, Фәнә Мифтахова, балта оҫтаһы Әхнәф Мөхәмәтдинов, слесарь Илмир Ямалов, диспетчерҙар Лариса Ҡазыханова, Гүзәл Ибра­һимова, Гөлнара Сәйетгәрәева, Эльвира Мәргәмова, водитель Эдуард Васильев был хеҙмәт участкаһының таянысы булып тора.

Предприятиеның күп кенә уңған­дары район, хатта республика кү­ләмендә маҡтаулы исемдәргә лайыҡ булған. Улар араһында Башҡорт­остандың атҡаҙанған торлаҡ-коммуналь хужалыҡ хеҙмәткәрҙәре Малик Рәхимов, Фәрит Закирйәнов, Самат Әхмәҙуллин, Рузил Фәтхелба­яновтар бар.

Коллектив үҙенең берҙәм, тырыш хеҙмәте һөҙөмтәһендә йылдан-йыл ҙур хеҙмәт уңыштарына өлгәшә. Әйтәйек, үткән йылда ҡаланы төҙөкләндереү, санитар таҙартыу йәһәтенән муниципаль килешеү буйынса 19 миллион 569 мең һумлыҡ, ҡала юлдарын ҡарау буйынса 8 миллион 30660 һумлыҡ эш башҡа­рылған. Ҡалған юлдарҙы ремонт­лауҙан да ҙур ғына табыш ингән. Килешеү тигәндән, унда ҡаралған хеҙмәт төрҙәре шаҡтай киң – юлдарҙы, тротуарҙарҙы ремонт­лайҙар, һыу ағыҙыу торбаларын тәртипкә килтерәләр, юл ситтәрен­дәге бордюрҙарҙы буяйҙар, юл билдәләрен яңырталар, юл там­ғалары һалалар һәм башҡалар.

Ҡала менән килешеү нигеҙендә Өфө – Нефтекама юлындағы Иванай ауыл туҡталышында павильон төҙөп ҡуйғандар. Ауыл биләмәләре хакимиәттәре менән дә хеҙмәт­тәшлек итәләр. Улар менән килешеү нигеҙендә үткән йылда ун километр оҙонлоҡтан күберәк юл ремонт­ланған. Предприятиеның матди-техник базаһы ҡеүәтле. Уны йыл һайын яңы техника иҫәбенә тулыландырып торалар.

Йәнә бер мөһим эш участкаһы тураһында әйтергә кәрәк. 2012 йылда ҡалалағы “Дүртөйлө” тип исемләнгән ҡунаҡхана эшмәкәрлеген дә предприятиеға йөкмәткәндәр. Унда заманса ремонт эштәре башҡа­рылған. Ҡунаҡтарҙы ғәҙәти бүлмәләр генә түгел, люкс һәм ярымлюкс рәүешендәге бүлмәләр ҙә ҡаршылай. Ҡунаҡхана директоры Розалия Вәлиәхмәтова һәм администратор Сәлимә Минәжетдинова ҡала ҡу­наҡтарының күңеленә хуш килерҙәй шарттар тыуҙырыу хәстәрлеген күрә.

“Коммунальник” предприя­тие­һының эшмәкәрлеге менән яҡындан танышҡас, был тырыш коллектив ысын-ысындан Дүртөйлө ҡалаһының йәшәйешенә йән өрә, тип әйтергә тулы нигеҙ бар.

Дүртөйлө ҡалаһы.