Теләгән – әмәлен эҙләр…

Нуриман районының Яңы Күл ауылында йәшәгән Бикбаевтар ғаиләһе тиктормаҫ, бал ҡортондай егәрле, көндө төнгә ялғап йәшәүсе тынғы белмәҫ заттарҙан. Ҡала­лағы рәхәт тормошто ташлап, һин дә мин эшләп йөрөгән ғаиләнең ауылға күсеп ҡайтыуы күптәргә ғәжәп тә тойолғандыр.

– Иптәшем Ғәтиәт тә Нури­ман­ға ҡайтырға риза булды. Теләгән әмәлен эҙләр, теләмәгән сәбәбен эҙләр, тигәндәй, тоттом да китап­ха­насылар техникумына уҡырға ин­дем. Китап ғилеме мәңгелек, ул туҙмай ҙа, юҡҡа ла сыҡмай, ке­ше­ләргә аң, иман, матурлыҡ тара­тыусы булараҡ, быуаттар буйы йәшәгән.

Бына 11 йыл инде Яңы Күл ауы­лының моделле китапхана­һында эшемде бик яратып баш­ҡарам. Ауыл халҡының 65 процен­ты – минең уҡыусыларым, уҡыу, белем ҡәҙерен белеүсе, китап йәнле дуҫтарым. Беҙҙең ауыл ҙур ғына ул, 1800 кеше йәшәй, – тип Гөл­сирә Фәнүр ҡыҙы яратҡан эше хаҡында бәйән итте.

Дыуамаллығы менән тарихта ҡалған 90-сы йылдарҙа бер кемгә лә тормош еңел бирелмәй. Ауылда иң беренсе булып баҡса еләге үҫтереүгә тотонған ҡатындың, бынан йәм, тәм табыуҙан тыш, табыш та алып ҡыуаныуына ышаныусылар аҙ була, әлбиттә. Иглин питомнигынан төрлө сортлы еләк­тәр алып ултыртып ҡарайҙар, әрһеҙерәк, сыҙамлыраҡ “великан” сортына туҡталалар.

– Йәй уңайлы, йылы килгән йылдарҙа уңыш ныҡ яҡшы булды, – ти һәүәҫкәр баҡсасы, – алтмышар биҙрә еләк йыйып алған мәлдәр бар ине.

Быйыл еләк урыны-урыны ме­нән генә булды, ҡырау һуҡты бит. Шулай ҙа күңелде төшөрмәй­беҙ, ҡайнатма әҙерләнек, еләк­лекте эшкәртәбеҙ, тәрбиәләйбеҙ. Киләһе йыл уңышы бөгөн һалына. Бикба­ев­тарҙың сүп әҫәре күрен­мәгән етмеш сутый ерҙе биләгән сөгөл­дөр, һуған, һарымһаҡ, еләк плантацияларын урап сыҡтыҡ.

– Шул хәтлем ерҙе нисек эш­кәр­теп өлгөрәһегеҙ, Гөлсирә? – тип аптырайбыҙ.

– IХ класты тамамлаған Айҙар – уң ҡулыбыҙ. Өлкән улымдың мәшәҡәттәре әле байтаҡ, яңыраҡ биология фәндәре буйынса кан­дидатлыҡ диссертацияһы яҡлап, беҙҙе ҡыуандырҙы. Фәндәр ака­демияһы институтында хеҙмәт итә. Ҡыҙым Гөлнур Башҡортостан дәүләт аграр университетында магистратурала уҡыу менән бергә лаборант та булып эшләй. Килә­сәген ул да ағаһы кеүек фәнгә ар­нарға уйлай. Яңы Күлгә йыш ҡайтып, беҙгә ярҙамлашырға ла өлгөрә.

Үҙебеҙҙең донъя мәшәҡәт­тәре­нә генә күмелеп йәшәмәйбеҙ, ту­ған-ырыу, дуҫ-иш менән ара­ла­шыр­ға ла ваҡыт табабыҙ. Бына бөгөн ип­тәшем Ғәтиәт туған­дары­на өй һа­лышырға ярҙамға китте. Һуғыш ве­тераны ҡайным да оло­ғай­ҙы, 92 йәштә. Уға ла күҙ-ҡолаҡ, ярҙамсы булыу кәрәк. Хәйер, уның ошо йәштә лә һалҡын һыу менән ҡойо­ноп, сәләмәт тор­мошҡа ылы­ғып йә­шәүе – беҙҙең өсөн һәйбәт үрнәк.

Бикбаевтарҙың хеҙмәте бушҡа китмәгән. Ергә һөйөү, кеше тор­мо­шоноң толҡаһы булған тырыш­лыҡ һөҙөмтәһендә генә бейек­лек­тәргә өлгәшеү мөмкинлеген балаларына ла һеңдерә алыу­ҙары менән улар бәхетле. Бары кин­йә­ләре генә яҙмышын ер, үҫем­лекселек менән бәйләргә иҫәбе юҡ, мотлаҡ фармацевт булам, кешеләргә шифалы дауа өләшә­сәкмен, тип хыяллана. Бикбаев­тарҙың һәр береһе үҙенә һуҡмаҡ ярырға өйрәнгән инде, кинйәләре лә булдырыр.

Нуриман районы,

Яңы Күл ауылы.