Бүребайҙа бер көн

Бүребай – Хәйбулла районының иң ҙур ауылдарының береһе. Ҡасандыр ул ҡасаба булараҡ билдәле ине, һуңғы йылдарҙа йәнә ауыл статусында.

Ауылдың барлыҡҡа килеүе Бүребай тау-байыҡтырыу комбинатының тарихына барып тоташа. Бүребай – таусылар төбәге, тип юҡҡа ғына атамайҙар. Бында һәр йортта тиерлек комбинатта эшләүсене осратырға мөм­кин: шахтерҙарҙың ғаилә династиялары байтаҡ. “Бүре­байҙа тыуғанһың икән, тимәк, һин шахтерһың” тигән ҡараш электән йәшәй, бөгөн дә йәштәр атай-олатайҙа­рының юлын лайыҡлы дауам итә.

Таусылар ауылы нисек көн итә, ниндәй проблемалары бар, халыҡ тау сәнәғәте предприятиеһының яҡында ғы­на урынлашыуынан зыян күрмәйме, экологик хәл нисек? Ошо һәм башҡа мәсьәләләрҙе күҙ уңында тотоп, сәфәребеҙҙе башлап ебәрҙек.

Ауылда бөтәһе 1 мең 864 хужалыҡ иҫәпләнә, 4571 кеше йәшәй, шуның 1061-ен хаҡлы ялдағылар тәшкил итә. Барлығы 11 ойошма бар, ауылда 50 эшҡыуар тер­кәл­гән.

Бүребай урта мәктәбе, “Ҡояшҡай” балалар баҡсаһы, Балалар сәнғәт мәктәбе, “Металлург” ауыл мәҙәниәт йорто, моделле китапхана, ауыл табиплыҡ амбулато­рия­һы, ҡояш электр станцияһы, күп функциялы үҙәк, почта бүлексәһе, бер нисә шәхси магазин бар. Районда ғына түгел, республикала иң ҡеүәтле сәнәғәт предпри­ятие­ларының береһе “Бүребай тау-байыҡтырыу” комбинаты ябыҡ акционерҙар йәмғиәте лә тап ошо ауыл “өҫтөндә” ултыра.