Ете тапҡыр шатландырҙы, ете тапҡыр моңландырҙы

Ейәнсура районының Үрген ауылы “Айыҡ ауыл-2019” конкурсында ҡатнашыу теләген белдерҙе. Сараны ойоштороусылар халыҡтың изге эшкә дәррәү ҡушылыуына шатлана. Әйткәндәй, уның сиктәрендә “Гүзәл заттар – тормош биҙәге” тигән күркәм конкурс-кисә үтте.

– Үрген Ерәнсә сәсән, Азат Абдуллин, Иншар Солтанбаев, Венер Абдуллин ише әҙип һәм сәнғәт әһелдәре менән данлыҡлы, бында алсаҡ һәм ихлас кешеләр йәшәй, – тип һөйләй “Ейәнсура таңдары” гәзите хәбәрсеһе Гөлшат Имелбаева. – Ауыл күҙгә күренеп үҫә, күтәрелә. Олоһон да, кесеһен дә ҡуҙғатып ебәреү маҡсатында ойошторолдо был сара. “Аҡ сәскәләр”, “Бәхетле әсәйҙәр”, “Һөйөклөләр”, “Йәш килендәр” исемле командаларға бүлдек. Гүзәл зат вәкилдәре ете төрлө бәйгелә ҡатнашты, тамашасыларҙы ете тапҡыр шатландырҙы, ете тапҡыр моңландырҙы, ете тапҡыр көлдөрҙө.

Гөлшат Имелбаева менән Фәрзәнә Аҡсурина бағыусылыҡ ярҙамы күрһәтте.