Баш ҡала таныштырған, Йәрмәкәй ҡауыштырған

Күп бала тәрбиәләгән әсәләрҙе Өфөгә саҡырып ҡотлау йолаһы Башҡортостанда электән һаҡлана. Күптән түгел Дәүләт Йыйылышы – Ҡоролтай Рәйесе Константин Толкачев бер төркөм уңған хужабикәләрҙе “Әсәлек даны” миҙалы менән бүләкләне.

Өлгөлө әсәйҙәр араһында Йәрмәкәй районынан Иралия Тимербаеваны күреү айырыуса шатлыҡлы ине. “Бала-саға тауышына күмелгән өйҙән сыҡҡы килмәй, сабыйҙар күберәк бул­ған һайын, донъя ла йәмлерәк!” – тигәйне ул саҡта яңы ғына күк­рәгенә миҙал таҡҡан әсәй кеше. Ошо көндәрҙә Иралия Сабирйән ҡыҙының ире Фидан Кәшип улы менән йәнә ос­раштыҡ.

– Кәләшем менән биш бала тәрбиәләйбеҙ, “тағы ла уйла­май­һығыҙмы?” тигән уйынлы-ысынлы һорауҙы күптәр йыш бирә, – тип башланы һүҙен Йәрмәкәй ауылының “Йәмих” мәсете имам-мөхтәсибе Фидан хәҙрәт. – Бе­леүебеҙсә, бөтәһе лә – Аллаһ Тәғәлә ҡулында. Ысынлап та, беҙҙең өсөн биш бала сик түгел. Икебеҙҙең дә фекер уртаҡ: балалар өйҙө бер итеп уйнаған һа­йын, донъя көтөүе лә еңелерәк.

Уңған Тимербаевтарҙың йортонда күп балалар йүгереп йө­рөгән шикелле, Йәрмәкәй ауы­лының үҙәгендә лә “Йәмих” мәсете янында халыҡ байтаҡ. Бөгөн йома намаҙына йыйыл­ғандар, былай көндәрҙә лә унан олоһо ла, кесеһе лә өҙөлмәй.

Әйткәндәй, Иман йортона 2000 йылда нигеҙ ташы һалынған, 2018 йылда үҙ ишектәрен асҡан. Ул халыҡ аҡсаһына төҙөлгән. Манараны шәхси эшҡыуар Фәнүр Иҙиәтуллин эшләгән, ә көмбәҙҙе Дамир Кәлимуллин бүләк иткән. Был урын шул тиклем хозур, эргәнән генә шишмә аға, ул йырҙарҙа йырланған Рә йылға­һын туйындыра. Уңға ҡараһаң да, һулға ҡараш ташлаһаң да ҙур булмаған урманлы тау менән осрашаһың.

Фидан хәҙрәт әйтеүенсә, Ал­лаһ йортоноң иркенлеге төрлө дини сараларҙы үткәреү өсөн отошло. Иң ҙурҙарҙан һаналған Ҡорбан ғәйете һәм Ураҙа байрамын уҙғарғанда 200-ҙән ашыу мосолманды һыйҙырыу – шуға асыҡ миҫал.

Йыл да уҡыусы балаларҙың оҙайлы йәйге каникулы осоронда бында лагерь ойошторола, Ок­тябрьскийҙан саҡырылған шә­керт ҡыҙ һәм малайҙар менән шөғөлләнә. Шулай уҡ сабыйға исем ҡушыу йолаһы еренә еткереп башҡарыла, йәштәр никах уҡытыу маҡсатында мәсеткә алдан уҡ сиратҡа яҙылып ҡуя. Әл­биттә, бындай сауаплы эштәр­ҙең береһе лә Фидан хәҙрәттең ярҙамсыларынан тыш үтмәй. Рәшит мәзин, Хәмит мәзин, Самат мәзин, Вил шәкерт бер һүҙле, уртаҡ уйлы булып эшләй.

Фидан хәҙрәт бәләкәй хаж ҡылған, тиҙәр. Ошо турала ла һораштыҡ.

– Бәләкәй, тимәк, Ғөмрә хажы ҡылдым, – тип һөйләй әңгә­мәсем. – Бынан бер нисә йыл элек Мәк­кәлә булдым. Киләсәктә иһә ҙур хаж ҡылырға уйлайым – Мәккәгә лә, Мәҙинәгә лә юл­ланасаҡмын. Ул бер көнлөк мәшәҡәт түгел, уға йылдар һуҙымында әҙерлә­нәләр. Иң мөһиме, һин күңелең­дән уға әҙер булырға тейешһең. Шул саҡта ғына оҙайлы сәфәргә сығырға мөмкин.

Яңы Шах ауылында тыуып үҫкән Фидан Кәшип улы билдә­ләүенсә, бәләкәй саҡтан уҡ өлә­сәһе Сәғиҙәнең намаҙ уҡығанын отоп алған, олатаһы Кашап та мулла булған. Намаҙға баҫыуға бер ҡасан да һуң түгеллегенә баҫым яһаны танышым.

Өфөлә Рәсәй Ислам университетында белем эстәгәндә Фидан хәҙрәттең бер һылыуҡайға күҙе төшә. Танышып китәләр, дуҫ­лыҡ дауам итә. Илеш ра­йо­нының Исәмәт ауылынан килгән Иралия Сабирйән ҡыҙы була. Бөгөн Тимербаевтарҙың ғаилә­һендәге баш бала Инсаф – Өфө дәүләт авиация техник университеты студенты, Әҙилә (X класс) менән Иҙрис (VI класс) – мәктәп уҡыусылары. Биш йәшлек Камил балалар баҡ­саһына йөрөй, ә ике йәшлек Сәлим әсәһе менән өйҙә.