Бал тапмаған ҡорт булмаҫ, мал тапмаған егет булмаҫ

– 2008 йылда беҙгә дәүләт ярҙа­мы итеп йорт һалыуға субсидия би­релде. Ул осор Айсар “Юлдашев” КФХ-һында эшләй ине әле, яйлап донъябыҙҙы төҙөп бөттөк, – ти Нурания.

Эйе, Ситдиҡовтар заманға зар­ланып, кемдәндер сәбәп эҙләп ултыра торған кешеләр түгел. Ана бит, балалар баҡсаһында эшләп декрет ялына сыҡһа ла, бәләкәс Сың­ғыҙы әле итәгенә генә йәбешеп йөрөр мәлен кисерһә лә, ир тап­ҡанға иш булһын, тип өс ай элек асҡан магазиндарында ла һатыу итергә өлгөрә бөтмөр хужабикә, донъяһын да көтә.

– 2005 йылда, Стәрлетамаҡ мәҙәни-ағартыу техникумын тамамлап, ауыл мәҙәниәт йортона эшкә килгәйнем. Бында мине эш кенә түгел, икенсе яртым да көтөп торған. 2007 йылда ғаилә ҡороп, парлы тормош менән йәшәп алып киттек. Бер-бер артлы улдарыбыҙ Алмас, Илназ, Сыңғыҙ тыуҙы. Өлкәндәре инде ҡул араһына инеп, атаһының, минең төп ярҙамсы­ларыбыҙ, Сыңғыҙ ғына әле бөтә­беҙҙе үҙ ҡурайына бейетер саҡта. Балалар баҡсаһына эшкә ингәс, тәр­биәсе һөнәренә уҡып, юғары белем алдым, – ти Нурания.

Оҫта ҡуллы Айсарға донъя төҙөү әллә ни ауырҙан булмаған – кем әйтмешләй, күҙ ҡурҡа, ҡул эшләй. Ишле итеп мал-тыуар көтә, күп итеп йәшелсә-емеш үҫтерә Сит­диҡовтар. Өй янында­ғы дәү теплицанан да мул уңыш алғандар. Урман эргәлә булғас, емеш-еләккә ҡырға китәһе түгел – Нурания ҡышҡа етерлек емеш-еләген яҡын­дан ғына йыйып, туңдырғысҡа һалған.

– Тауарҙы башлыса Белореттан ташыйбыҙ, эшебеҙ ыңғайлап китер тигән өмөттәбеҙ, – ти Айсар.

Эйе, ике уңған пар килһә, ырыҫ яуыр, тип тиккә әйтмәйҙәр шул – Брәтәк уңғандары Ситдиҡовтар ошоно эше, йәшәйеш-торошо менән раҫлай.

Бөрйән районы.