Ғәйрәт иткән тау ярыр

Бөгөн хужалыҡта баш­ҡорт тоҡомло аттар үрсетәләр. Малҡайҙарҙың һаны 200 башҡа еткән. КФХ урмансылыҡ менән дә шө­ғөлләнә, пилорамалары ла бар. Заказ буйынса халыҡҡа бура бурайҙар, таҡта яралар, утын әҙерләйҙәр. Машина-трактор оҫтахана­һында урындағы халыҡ техникаһын ремонтлай. Ҡасабаның социаль-мәҙәни учреждениелары хужалыҡ ҡаҙанлығынан йылытыла.

Дөйөмләштереп әйткән­дә, ауыл ерендә ниндәй эш бар, барыһын да башҡара хужалыҡ хеҙмәткәрҙәре. 16 кеше штатта иҫәпләнә. Миҙ­гелле эштәр ваҡытында өҫтәмә хеҙмәт урындары ла булдырыла. КФХ-ның биш тракторы, бер йөк маши­на­һы, тейәгестәре, арбалары бар. Әйткәндәй, техника һатып алғанда, кредиттарҙы өлөшләтә ҡаплау өсөн дәү­ләт ярҙамы ла күрһәтелә.

Мозафар Харис улы, төп эшенән тыш, йәмәғәт тормошонда ла ҡайнап йәшәй. Бынан ике йыл элек тыуған еренең ысын патриотын яҡташтары район Советы депутаты итеп һайлай. Икенсе йыл рәттән Мозафар Харис улының башланғысы менән районда Барын-Табын ырыуы йыйыны ойошторола. Ат сабышы, “Ылаҡ” уйыны, мәргән уҡсылар, көрәш бәйгеләре үтә. Ярыштарҙың күбеһендә бағыусы булараҡ сығыш яһай Мозафар Харисов. Әйткәндәй, ул үҙен ғәҙел һәм ярыш шарттарын яҡшы белгән судья булараҡ та танытҡан.

Райондың төньяғы иҫ киткес гүзәл тәбиғәте менән билдәле. Киләсәктә Мозафар Ҡадиров тыуған ерендә туризмды үҫтереү теләге менән яна. Бының өсөн ул ауылдан бер нисә саҡрым алыҫлыҡтағы гүзәл тәбиғәт­ле урында туристар өсөн туҡталҡа эшләп ҡуйған. Тирмә формаһында төҙөл­гән йорт, мунса хәс башҡорт йәйләүен хәтерләтә, сығыш яһар өсөн сәхнә лә төҙөп ҡуйылған.