Хаҡлы ялда нимә менән шөғөлләнергә?

Ҡатын-ҡыҙҙар өсөн – бе­ренсе йүнәлеш. Был төркөмгә байтаҡ эшмә­кәрлек төрө инә:

* кейем бәйләү;

* сигеү;

* скрапбукинг;

* кейеҙ баҫыу;

* уйынсыҡ яһау;

* ҡорама ҡорау;

* башҡалар.

Шөғөлдәр исемлеген дауам итергә мөмкин. Күңелегеҙгә ятҡан эш бар икән, оҫталығығыҙ булмаһа ла, өйрәнергә була. Бының өсөн интернет селтәрендәге оҫталыҡ дәрестәре ярҙамға килер.

Үҙегеҙ яһаған әйберҙе һатыуҙың бер нисә ысулы бар:

* дуҫтар һәм таныштар араһында;

* интернеттағы махсус түләүһеҙ майҙансыҡтарҙа;

* социаль селтәр аша;

* йәрминкәләрҙә – ҙур ҡалаларҙа улар даими үткәрелә.

Ҡул эштәрен һатыу ысулдары бихисап. Иң мөһиме – ысынлап оҡшаған һәм мауыҡтырған йүнәлеште табыу.

2. Заказға кейем тегеү

Хаҡлы ялда йәнә заказға кейем тегеү менән шөғөлләнергә мөмкин. Бының өсөн һеҙгә кәрәк:

* теген машинаһы;

* тегеү оҫталығы;

* зауыҡ;

* кейем өлгөһөн яһай белеү.

Әйткәндәй, башҡаларҙа булмаған берҙән-бер даналағы кейемгә хәҙер ихтыяж бик ҙур, айырыуса үҙенсә­лекле, дизайнер әйберҙәренә. Байрам һәм иҫтәлекле даталар осоронда клиенттар бигерәк тә күп була. Ундайҙарға түбәндәгеләр инә:

* мәктәптәге сығарылыш кисә­ләре алдынан;

* 1 сентябрь алдынан;

* Яңы йыл байрамы алдынан һ.б.

Байрамды көткәндә гүзәл зат берәүҙә лә осрамаған үҙенсәлекле күлдәк тектерергә тип ательеға юлланыусан, шуға күрә үҙегеҙҙе танытып, оҫталығығыҙҙы күрһәтә алһағыҙ, клиенттарҙан өҙөлмәҫ­һегеҙ, тимәк, үҙегеҙгә килем дә тәьмин итерһегеҙ.

Иғтибар! Кейем-һалымды төҙәтеп, ямап, молния тегеп тә өҫтәмә аҡса эшләргә мөмкин.

3. Һабын ҡайнатыу

Хаҡлы ялда тағы ла бер ҡы­ҙыҡлы шөғөл – һабын яһау. Ингре­диент­тарҙы дарыухананан арзан хаҡҡа алырға була. Интернеттағы тематик сайттарҙа һабын ҡайнатыу алымдары тәфсирләп яҙылған – уҡығыҙ, үҙегеҙҙе һынап ҡарағыҙ.

Бөгөн халыҡтың күпселеге экологик тауарҙарға, органик кос­метикаға өҫтөнлөк бирә. Тәбиғи сеймалдан яһалған һабынға ла ихтыяж ҙур. Ҡулдан һабын эшләү өсөн кәрәкле компоненттар исемлеге:

* хуш еҫле майҙар;

* үҫемлек майҙары;

* косметик ләм;

* диңгеҙ тоҙо;

* башҡа тәбиғи элементтар.

Һабынды ҡайнатыу ғына етмәй, уны йәтеш итеп бүлергә, үҙенсәлекле ҡап һайларға ла кәрәк.

Кәңәш! Һабынды оҫталарҙың йәрминкәһендә һатырға була. Үҙегеҙ тураһында мәғлүмәт бирелгән визиткаларҙы алдан уҡ эшләтегеҙ һәм тауарығыҙ ҡуйылған стенд эргәһенән үткән кешеләргә уларҙы таратығыҙ. Һеҙгә мотлаҡ шылты­ратырҙар һәм һабынығыҙҙы алырға теләк белдерерҙәр. Йәнә шуны онот­мағыҙ: үҙегеҙҙең брендты булды­рығыҙ. “Компанияғыҙ”ҙың отошло атамаһы тауарығыҙҙы танытыуға булышлыҡ итер.

Пенсияла татлы ризыҡтар – торт, ләүәш, бәлеш бешереү менән шөғөлләнергә була. Әйткәндәй, аш-һыу буйынса сикләүҙәр юҡ, билмән, манты, башҡа ашамлыҡтар әҙер­ләүгә әүәҫлегегеҙ булһа, рәхим итегеҙ – өйҙә ҡабатланмаҫ, үҙен­сәлекле итеп бешерелгән ризыҡ­тарға ихтыяж һәр саҡ ҙур.

Аҡса эшләү маҡсатында эшмә­кәрлекте башлау өсөн иң элек бизнесыңды законлаштырыу шарт. Бының өсөн түбәндәге эштәрҙе башҡарырға кәрәк:

* тейешле рөхсәт документтарын алырға;

* санитария кенәгәһен тулты­рырға.

Үҙегеҙ бешергән ризыҡтарҙы һатыуҙың иң ҡулай ысулы – таныштарығыҙ аша. Ғаилә байрамдарын үткәрергә йыйынғандар һеҙгә мотлаҡ мөрәжәғәт итәсәк. Шулай уҡ йортоғоҙ янындағы кафе хужалары менән һөйләшергә мөмкин – татлы ризыҡтарығыҙ менән уларҙың да ҡыҙыҡһыныуы ихтимал. Ашам­лыҡты бешереү генә етмәй, уның биҙәлеше лә ҙур әһәмиәткә эйә.

5. Шәхси сайт йәки блог

Ҡул эштәрен бер аҙға ситкә ҡуйып торайыҡ. Хаҡлы ялда үҙ сайтыңды йәки блогыңды асырға була. Иң мөһиме – күҙалланған аудиторияла ҡыҙыҡһыныу һәм ихтыяж тыуҙы­рырлыҡ дөрөҫ тема һайлау. Арта­банғы ғәмәлдәр әллә ни ҡыйын түгел:

* мәҡәләләр яҙығыҙ;

* уларҙы эшкәртегеҙ;

* бер нисә айҙан сайт мәғлүмәтте эҙләү сәхифәһендә сағыла;

* рекламанан һеҙгә аҡса килә.

Сайт асыуҙан ҡурҡырға ярамай. Бының өсөн махсус оҫталыҡ та, белем дә кәрәкмәй. Уны теләге булған һәр кем аса ала. Әйткәндәй, хәҙер онлайн тәртибендә түләүһеҙ тренингтар даими уҙғарыла. Уларҙа мәҡәлә яҙырға, аудитория менән эшләргә, реклама яһарға өйрәтәләр. Сайт – онлайн-бизнесты үҫтереү өсөн ҡулай алым. Әлбиттә, шунда уҡ килем алыуға өмөт итергә ярамай, уның ҡарауы, проект киң таралғас, табыш та артасаҡ.

(Дауамы бар).