Күңел йылыһы һәр кемгә етә

Айгөл – Баймаҡ райо­нының Темәс ауылы ҡыҙы. Сибай ҡалаһында сауҙа-иҡтисад колледжында бухгалтер-иҡтисадсы һөнәренә эйә була.

Ауыл ерендә мәшғүллек мәсьәләһенең киҫкенлеген бөтәбеҙ ҙә белә. Һәр кемдең матур итеп йәшәгеһе, балаларын лайыҡлы, етеш тормошта үҫтергеһе килә. Шуға күрә Айгөл Себер тарафтарына китеп эш башлай. Әммә ниндәй генә аҡсалы яҡ булмаһын, тыуған ер үҙенә тарта шул. Шуға күрә ул кире әйләнеп ҡайта һәм яңынан эш эҙләйһе урынға, уны үҙе булдыра. Булдырып ҡына ҡалмай, ауылдаштарын да шөғөллө итә. Ул әсәһенең һөнәрен дауам итеп, шәхси эшҡыуар булып китә һәм магазин тота башлай.

Бөгөн Темәс ауылында уның ике сауҙа нөктәһе бар. Улар “Дуҫлыҡ” һәм “Регина” тип атала. Бынан тыш, ул Темәс биләмәһендәге мәктәптәрҙе аҙыҡ-түлек менән тәьмин итә.

– Әсәйемә, Нәзилә Ғари­фулла ҡыҙы Яхинаға, рәх­мәт әйтәм. Ул ғүмере буйы сауҙа тармағында, ҡулла­ныу­сылар йәмғиәтендә һа­тыусы булып эшләне. Мин бәләкәй саҡтан уның янында магазинда булдым, ярҙам иттем. Кешеләр менән эшләү шул тиклем оҡшай ине. Уҙған быуаттың 90-сы йылдары аҙағында атайым Рәмил Әйүп улы менән ауылда “Гөлназ” тигән магазин асып ебәрҙеләр. Аҙаҡ инде әсәйем миңә: “Йә, ҡыҙым, артабан һин дауам ит, эште беләһең, барыһына ла өйрәндең. Һин минән яҡшыраҡ булдырырһың”, – тине. Яҡын кешем ышанып тапшырғас, тотондом, – тип хәтирәләре менән уртаҡ­лаша ул.

Белгән, күңелгә ятҡан эш ырамлы була бит. Айгөл әсәһенең эшен дауам итеп кенә ҡалмай, уны үҫтерә, уңыштарға өлгәшә һәм шулай яйлап икенсе магазинын да аса.

Бөгөн ауыл халҡы был магазиндарға ҡарап ҡына тора. Эшҡыуар үҙен яуаплы, ғәҙел итеп күрһәтеп өлгөр­гән. Ул һәр ваҡыт яңы тауарҙар алып килә, уның кәштәләрендә иҫкергән әйбер бер ҡасан да булмай.

– Буран булһынмы, ел-дауыл сыҡһынмы, ауыл халҡы аҙыҡ-түлектән өҙө­лөргә тейеш түгел. Тауарым һәр ваҡыт яңы, сифатлы булырға тейеш тигән талап ҡуйған­мын һәм бар көсөмдө һалып быны үтәйем. Һатып алыусы ышанысын аҡларға кәрәк бит. Үҙем машина йөрөтәм, тауарҙы ваҡы­тын­да алып ҡайтам, – ти Айгөл.

Дүрт ауылдашын эшле иткән ул. Әлиә Ярҡынбаева, Фәнүзә Рәсембәтова, Флидә Кинйәбаева һәм Гөлназ Мә­жи­товаларҙы үҙенең уң ҡулы тип иҫәпләй. Һәр эштә уларға таяна. Шулай уҡ йүнсел ҡатын хәйриәлек менән дә шөғөлләнә. Мәҫә­лән, яңыраҡ ҡына инвалид балаларға ярҙам иткән. Бының кеүек эштәрен һанап бөтөрлөк түгел, тик ул маҡтанырға яратмай.

Айгөл Аҡбулатова – хәстәрлекле әсәй ҙә. Өлкән ҡыҙы Регина – студент, Өфөлә белем ала. Азалиә менән Риаз иһә мәктәптә уҡып йөрөй. Уның яҡын­дарына ла, яратҡан эшенә лә күңел йылыһы, дәрт-дарманы етә.