+16 °С
Облачно
Йәмғиәт
6 Марта 2020, 09:51
Көндәре эштә ҡайнап үтә
Хаҡлы ялда ла шөғөл табырға була.
Мәсетле районының Һабанаҡ ауылынан крәҫтиән (фермер) хужалығы етәксеһе Ольга Йәрмөхәмәтованы Өфөгә килгәнендә – “Ҡатын-ҡыҙ – йыл етәксеһе” республика конкурсында осраттым. Ғәжәп яҙмышлы ханым менән әңгәмәләшеү форсаты тейҙе.
– Пенсияға сыҡҡас, икенсе һулыш асылды, – тип йылмая Ольга Йәрмөхәмәтова.
Ысынлап та, төп һөнәре буйынса (иҡтисадсы, агроном) фиҙакәр хеҙмәт итеп, эштән туҡтағас, уйланыуға ҡала ул. Һау-сәләмәт көйө, дүрт баланы башлы-күҙле итер саҡта нисек инде тик ултырмаҡ кәрәк. Етмәһә, ауыл иркен, ҡулы эш белә. Кәңәшле эш тарҡалмаҫ – ғаиләһе менән уртаҡ фекергә килеп, бынан алты йыл элек “Яңы эш башлаған фермер” программаһында ҡатнашып, еңеп сыға. Малды ишәйтеүгә ярҙам итә ул. Грант аҡсаһына 500 литрлыҡ һөт һыуытҡыс алалар.
Йәрмөхәмәтовтар ғаиләһе дәртләнеп эшкә тотона. Мал һаны арта. Хәҙер уларҙың ҡураһында 85 баш һыйыр малы иҫәпләнә, шуның 45-е һауыла. Яйлап ер алалар, бесәнлекте киңәйтәләр, күп йыллыҡ үлән сәсәләр. Трактор, өс йөк машинаһы, “ГАЗель” эште алға ебәреүгә булышлыҡ итә. Ауыл ситендә 35 һыйырға иҫәпләнгән яңы һарай сафҡа инә. Ете ауылдашын эшле итә улар.
Ул арала уңған эшҡыуарҙы Өфөгә уҡырға ебәрәләр. Ольга Матвеевна унан күңел офоҡтары киңәйеп, дәртләнеп ҡайта һәм ҡошсолоҡ тармағына тотона. Бройлер себештәре үҫтереп һатыу эшен йәйелдерә. Ауылдаштары ла яҙ етеү менән себеш эҙләү мәшәҡәтенән ҡотола. Уларға ла ярҙам бит. Был осорҙа “Ғаилә малсылыҡ фермаһы” программаһы ярҙамға килә. Грант аҡсаһы ҡош-ҡорт һуйыу, ҡаҡлау, төрөү цехы асырға һәм машина алырға ярҙам итә. Райондың балалар баҡсалары, мәктәптәр, шифахана ашханаларын тәмле ризыҡ менән тәьмин итәләр хәҙер.
– Ярҙамсыларһыҙ үҙ эшемде асыу мөмкин булмаҫ ине. Төп терәгем – ғаиләм, – ти уңған эшҡыуар.
Өс улы – Альберт, Эдуард, Денис, ҡыҙы Альбина һәм кейәүе Ваган ниндәй эшкә тотонһалар ҙа, ҡулдарынан килә.
– Көнөбөҙ эштә ҡайнап үтә, кемдер – яланда, кемдер – фермала, кемдер әҙер продукцияны һатыуға сығара, – ти фермер. – Егет кешегә етмеш төрлө һөнәр ҙә аҙ, тигәндәй, балаларым эш белеп үҫте, техника боҙолһа, тиҙ генә йүнәтеп ҡуялар, һәр нәмәгә ҡулдары оҫта.
Ә кис, эш бөткәс, татыу һәм эшһөйәр ғаилә төп йортҡа йыйыла, туғыҙ ейән-ейәнсәрҙең көр һәм шат ауаздарынан йорт тағы ла йәмләнеп киткәндәй. Нигеҙ ҡотон һаҡлар, эште дауам итер быуын үҫә.