Йәшәйеш асылы – ғәҙеллек өсөн көрәштә

Хәмит ауылында мәктәпте тамамлап, Өфөләге 2-се педагогия учили­ще­һының художество-графика бүле­гендә белем эстәй. Уҡыу йортон та­мамлағас, тыуған яғына ҡайта һәм рәсем, һыҙма дәрестәрен уҡытырға хыяллана, тик уға һөнәре буйынса эш булмай. Шуға ул Әбделғәзе мәктәбендә башланғыс кластар уҡы­тыусыһы, Буранғол урта мәктәбендә өлкән пионервожатый, рәсем уҡытыу­сыһы булып эшләй.

Бер аҙҙан, юғары белем алыу маҡса­тында, Башҡорт дәүләт уни­версите­тының юридик факультетына уҡырға инә. Ҡулына диплом алғас, юғары белемле белгес яҙмышына яҙғанса Ҡыйғы тарафтарына килен булып төшә. Унда райондың ауыл хужалығы идара­лығында кадрҙар буйынса өлкән инспектор булып хеҙмәт юлын башлай. Унан һуң район комсомол комитеты комсоргы вазифаһында үҙен егәрле етәксе булараҡ танытҡас, район советына ойоштороу бүлеге мөдире итеп үрләтәләр.

Биш йылдан һуң Ҡыйғы районы хакимиәтенең юридик ярҙам күрһәтеү бүлеге мөдире итеп тәғәйенләнә. Тотош районға бер генә адвокат – енәйәт, гражданлыҡ, административ һәм арбитраж эштәрен башҡарыу бер үҙенең иңенә төшә. Бында ла һынатмай ул, 14 йыллыҡ эшмәкәрлеге дауамында халыҡ араһында абруй яулауға өлгәшә.

Шулай уңышлы ғына эшләп йөрө­гәнендә Әлфиә Әхтәр ҡыҙын Башҡорт­остан адвокаттар коллегия­һының Өфө ҡалаһы Совет районын­дағы 2-се филиалына адвокат итеп саҡыралар. Ғаилә Өфөгә күсенә.

Бала сағынан Әлфиәнең тырыш­лы­ғына, ныҡыш булыуына һоҡла­нып, уға бәхетле яҙмыш юрайҙар. Тормошта үҙ урынын тапҡан, хеҙ­мәттәштәренең, яҡланыусы­ла­рының абруйын яулаған ул. Әлфиә Рәхимованың хеҙмәте хөрмәтле, юғары баһаға лайыҡ була. Тәж­рибәле адвокат Рәсәйҙең һәм Баш­ҡортостандың Адвокаттар палатаһы президентта­рының Маҡтау ҡағыҙ­ҙарына эйә. Уларҙа яҡташыбыҙҙың үҙ һөнәрендә юғары оҫталыҡҡа өлгәшеүе, бергә эшләгән хеҙмәт­тәштәренең ихтирам һәм хөрмәтен яулауы һыҙыҡ өҫтөнә алынған.

Ғәҙеллек өсөн, кешеләрҙе яҡлау өсөн ярты ғүмерен арнаған адвокат Әлфиә Рәхимова, енәйәт эштәре буйынса яҡлаусы булараҡ, закон боҙоусыла иң элек кешене күрә. “Бик һирәктәр генә кире тайғаҡ юлға баҫа, күп осраҡта ул үкенә, тәүбәгә килә. “Енәйәтсе” тип уны бөтөрөп ташларға ярамай. Хоҡуҡи яҡтан ул да ярҙамға һәм кәңәшкә мохтаж”, – ти тәжрибәле адвокат. Бик ауыр енәйәттәргә бәйле эштәр менән шөғөлләнергә тура килә уға: кеше үлтереү, көсләү... Шунда ла ул ярҙамға мохтаж кешегә ышанып, аңлап, йәлләп ҡарай.

Адвокатты йыш ҡына табип менән сағыштыралар: пациенттың һаулығы өсөн көрәшкән кеүек, адвокат та кешенең киләсәген хәл итә. Һәр эште законға ярашлы ғына түгел, ә тормош бизмәненә һалып та үлсәгән Әлфиә Әхтәр ҡыҙының ауыр хеҙмәтендә сабырлыҡ теләйек. Ул ғәҙеллек өсөн көрәшеүҙе, уны яҡлауҙы тормош асылы итеп алған бит.