Ҡалабыҙ балҡып тора!

Республикабыҙҙа күркәм һәм таҙа ҡалалар бихисап. Яңауыл –шуларҙың береһе. Урындағы халыҡ ҡалаларын бик ярата, ул төҙөк һәм йәшәүгә уңайлы булһын өсөн бар көсөн һала.

Бөгөн ҡаланың матурлығына туранан-тура мөнәсәбәте булған “ЯнаулБлагоустройство” яуап­лылығы сикләнгән йәмғиәте ме­нән яҡынданыраҡ таныш­тыр­маҡ­сыбыҙ. Ҡала урамдарында уларҙың ҡулы теймәгән урындар юҡтыр. Юлдарҙың һәм тро­туарҙарҙың төҙөклөгө, парк һәм скверҙарҙың йәшеллеге, Яңа­уылдың яҙҙан алып көҙгә тиклем сәскәгә күмелеп ултырыуы, ял итеү өсөн уңайлы һәм зауыҡ­лы урындар – барыһы ла улар­ҙың тырышлығы һөҙөмтәһе.

Йәмғиәттең директоры Алмас Фәйзуллин белдереүенсә, коллективта 60 кеше хеҙмәт итә. – Беҙҙең эштәрҙе һанай китһәң, улар бик күп. Юлдарҙы төҙә­тәбеҙ, ҡыш урамдарҙы ҡарҙан таҙартабыҙ. Газондарҙы тәртип­тә тотоу, уларға сәскәләр ултыртыу ҙа беҙҙең бурыс, – ти Алмас Йәғәфәр улы.

Әлбиттә, уларҙың эшмәкәр­леге бының менән генә сиклән­мәй. Иҫкергән ағастарҙы ҡырҡа­лар, яңыларын ултырталар. Баш­лыса тирәк, миләш, ҡайын, шыршы кеүек ағастарға өҫтөн­лөк бирелә. Предприятие ҡала урамдарын йәшелләндереү ме­нән дә шөғөлләнә тигәйнек. Был – мөһим йүнәлештәрҙең береһе.

Предприятиеның сәскә үҫте­реү өсөн махсус теплицаһы бар. Республиканың торлаҡ-коммуналь хужалыҡ тармағында теплица булдырған башҡа предприятиелар юҡтыр ҙа әле. Бында эштәр ҡыш уртаһында башлана. Көндәр йылыта башлау менән үҫентеләрҙе ҡала урамдарына сығарып ултырталар. Улар һалҡын көҙ еткәнсе бар халыҡты шатландырып үҫә. Әйткәндәй, үҫентеләрҙе һатыуға ла ҡуялар.

Башҡа хәстәрлектәре лә күп йәмәғәт хеҙмәткәрҙәренең. Йә­шел­ләндереүҙән тыш, улар юл­дарҙы тәриптә тотоу һәм ремонтлау менән шөғөлләнә. Бының ни тиклем ауыр һәм яуаплы икән­леген һәр кем аңлай. Улар бар­лығы 170 километр юл өсөн яуап­лы. Бынан тыш тыҡрыҡ­тар, тротуарҙар, күперҙәр ҙә уларҙың иңендә. Юл билдәләрен яңыр­тыу, арт-объекттар эшләп ҡуйыу улар өсөн бер ни тормай. Йәй көндәре иһә эштәр тағы ла арта. Көндәлек хеҙмәт менән бер рәттән төҙөкләндереү объекттарын ремонтлау, техниканы ҡышҡылыҡҡа әҙерләү өҫтәлә.

Һәр предприятие хеҙмәт­кәр­ҙәре менән дан тота. “ЯнаулБлагоустройство” ла оҫта белгес­тәре менән хаҡлы рәүештә ғо­рур­лана. Бында бөтәһе биш бригада тупланған. Араларында йәшелләндереүселәр, юл эшсе­ләре, төҙөкләндереүселәр, во­дителдәр, механизаторҙар бар. Уларҙың барыһы лә тәжрибәле, үҙ эшенең ысын оҫтаһы. Мә­ҫәлән, йәшелләндереү бригадиры Луиза Кәлимуллина, механик Илшат Әхмәтйәнов, сәскә ултыртыусылар Альбина Хужина, Любовь Садиахметова, Илмира Әхмәтйәнова, Резида Мөкминова, өлкән мастер Шәйхинур Шәйхетдинов, баш бухгалтер Люция Вәлиева һәм башҡа бик күптәрҙе билдәләне предприятие директоры Алмас Йәғәфәр улы.

Тырыш хеҙмәт иғтибарһыҙ ҡалмай, әлбиттә. Ҡаланы йә­шелләндереүҙәге тырыш­лыҡ­тары өсөн улар күп тапҡырҙар район һәм ҡала хакимиәтенең Почет грамоталары менән бүләкләнгән.

Предприятие өлгәшелгән уңыштарҙа туҡтап ҡалырға йыйын­май, киләсәккә ҡарап эшләүен дауам итә, ә яңауылдар уларға бик рәхмәтле. Матур һәм төҙөк урында йәшәүе лә күңелле бит.