Ҡәҙерен беләйек

“Советтар Союзы Геройы исемен йөрөткән Шығай урта мәктәбендә инде 36 йыл уҡыусыларҙы рус теле һәм әҙәбиәтенән уҡытам. Ошо дәүерҙәге эшемдә иң ҙур уңыштарым – Башҡортостандың Мәғариф алдынғыһы булдым, 2019 йылда Башҡортостандың 100 йыллығына арналған миҙал тапшырҙылар. Олатайым, атай-әсәйем дә уҡытыусы инеләр. Уларҙың хеҙмәтенә тап төшөрмәй эшләп йөрөүем менән ғорурланам”, – тип башлана был хат.

Фото төшөрөүгә уны тыуған яғының хозур тәбиғәте йәлеп иткән. Беҙгә ебәргән фотоһүрәттәрендә тыуған ауылы Шығай янындағы Ҡыраҡа тауының тирә-яғы сағылдырылған.

– Тәбиғәткә сыҡһаң, күңелгә ял булып ҡала. Балаларым, ейәндәрем менән тау-урмандар ҡыҙырырға яратабыҙ. Һәр кем өсөн үҙенең тыуған ере яҡын һәм ҡәҙерле, мин быны яҡшы аңлайым. Тик барыбер беҙҙең яҡ хозурлығына еткән урындар һирәктер. Ғөмүмән, Башҡортостаныбыҙ – бик матур һәм күркәм төбәк. Уҡыусыларыма, балаларыма уның ҡәҙерен белергә өйрәтәм, – тип яҙа Зилә Сәйфуллина.

Һеҙ ҙә бәйгенән ситтә ҡалмағыҙ! Бер нисә матур фотоһүрәтегеҙҙе alfia.85@bk.ru йәки bashkortostan.gazeta@mail.ru электрон адрестарына “Йәшәйеш – ул үҙе бер миҙгел!..” фотоконкурсына” тип яҙып ебәреүегеҙ һорала.

Шарттар буйынса, һеҙҙән хозур тәбиғәт күренештәре, заман­даштарыбыҙ, йәнлектәр, төрлө мәлдәр сағылдырылған матур, йәнле эштәр көтәбеҙ. Шулай уҡ автор тураһында ҙур булмаған мәғлүмәт тә булһа, яҡшы. Еңеүсе авторға бүләк тапшырыласаҡ.