+28 °С
Облачно
Йәмғиәт
30 Апреля 2020, 09:55
Эш һөйгәнде ил һөйгән
30 йәшендә – Социалистик Хеҙмәт Геройы.
Ниндәй генә осор булмаһын, хеҙмәт кешеһе һәр саҡ абруйлы булып ҡала. Эшсән Башҡортостан халҡы илгә тоғролоғон хеҙмәттә лә, яуҙа ла меңдәрсә тапҡыр иҫбатланы, шуға улар араһында Социалистик Хеҙмәт геройҙары ла бихисап.
Илһөйәр хеҙмәтсәндәрҙе күтәреү, данлау маҡсатында 1928–1938 йылдарҙа Башҡортостанда “Хеҙмәт Геройы” исеме бирелә башлай, һуңынан Социалистик Хеҙмәт Геройы исеме менән наградлайҙар. Ошо йылдарҙа республиканан 224 кеше юғары исемгә лайыҡ була. Ошондай уҙамандарҙың береһе Килдебай Сөләймәнов Хәйбулла районында йәшәй.
Ул 1943 йылда Йомағужа ауылында тыуған. 16 йәшендә генә һөтсөлөк фермаһында мал ҡараусы булып эшкә төшә. Совхозда һауынсылар етмәй башлағас, ҡатын-ҡыҙ эше тип тормай – һауынсылыҡҡа тотона. Тәүге йылда уҡ ул алдынғылар рәтенә сыға. Хужалыҡ комсомолдары тырыш һауынсыны үҙҙәренең ойоштороусыһы итеп һайлап ҡуя. Шулай итеп, ул бөтә хеҙмәт юлын (1958–2003 йылдар) Хәйбулла районының “Таналыҡ” хужалығына арнай.
Эштән ҡурҡмаған уңған егет ете йылға яҡын һауынсы, 1967 йылдан – мал ҡараусы, 1984–2001 йылдарҙа – бригадир, 1989 йылдан – бүлексә идарасыһы, 2002 йылдан бухгалтер булып эшләй. Малсылыҡта юғары күрһәткестәргә өлгәшә – 1972 йылда ул һәр быҙауҙың уртаса тәүлек артымын 1140 грамға тиклем еткерә. Тынғыһыҙ эшсе йәмәғәт тормошонда ла әүҙем ҡатнаша, ситтән тороп ауыл хужалығы техникумын да тамамлай.
Ә бит уның тормош юлы бер китапҡа ғына һыйырлыҡ түгел. 23 йәшендә Ленин ордены кавалеры була, 25 йәшендә иһә комсомол съезы делегаты итеп һайлана. 30 йәшендә уға Социалистик Хеҙмәт Геройы исеме бирелә. Артабан инде РСФСР-ҙың Юғары Советы депутаты (33 йәштә), яңынан профсоюздар съезы делегаты (35 йәштә), унда уны ВЦСПС ағзаһы итеп һайлайҙар, РСФСР Юғары Советы депутаты (40 йәшендә), КПСС съезы делегаты. Килдебай Сөләймән улы Хәйбулла район Советына һәм Таналыҡ ауыл Советына күп тапҡыр депутат итеп һайлана, район комитеты һәм партия өлкә комитеты ағзаһы була. Халыҡтар дуҫлығы ордены менән наградлана. ВДНХ-ла ҡатнашыусы булараҡ, “Москвич” автомобиле менән бүләкләнә.
Ғөмүмән, үткән быуаттың 70 – 80-се йылдарында ауыл эшсәндәре араһында Килдебай Сөләймәнов кеүек билдәле кешеләр һирәк булғандыр. Районда эш тәҡдим итһәләр ҙә, ул үҙен үҫтергән, шәхес иткән хужалығына тоғро ҡала.
2003 йылда хаҡлы ялға сыға, әммә ул йәмәғәт тормошонан ситләшмәй – Яңы Украинка ауылының һуғыш һәм тыл ветерандары ойошмаһы рәйесе була, үҫеп килгән йәш быуында илһөйәрлек тойғоһон тәрбиәләүгә тос өлөш индерә. Уның үҙен дә район етәкселеге онотмай, байрамдарҙа ҡотлап, хәлен белешеп торалар. Социалистик Хеҙмәт Геройы Килдебай Сөләймәновтың яҙмышы – үҙе бер ҡабатланмаҫ тарих.