Берҙәмлек һәм хәстәр өсөн эргәлә булыу мөһим түгел...

Әлегә бәләнән ҡотолоу өсөн дарыу ҙа, вакцина ла юҡ, фәҡәт беҙҙең иңгә ятҡан яуаплылыҡ ҡына бар. Бының өсөн иң ябай талаптарҙы үтәү фарыз. Мәҫәлән, берҙәмлек һәм хәстәр өсөн эргәлә булыу мөһим түгел. Был тө­шөнсә нимәне аңлата?

Әлеге ваҡытта беҙ, үҙизоляциялау режимында бул­ғанға күрә, яҡындарыбыҙ, дуҫта­рыбыҙ, туғандарыбыҙ янына барыу­ҙан тыйылып торабыҙ. Әммә заман мөмкинлектәре улар менән телефон йә видеобәйләнеш аша хәбәрләшеп торорға, курьер хеҙмәте тормош кәрәк-яраҡтарын алып барып еткерергә ярҙам итә. Йылы һүҙ, бер-беребеҙҙе аңлау, ошо ауыр осорҙа рухи терәк булыу – бына ошо ғәмәлдәр мөһим бөгөн.

Ҡатмарлы мәлдә табиптарҙың хәле хаҡында ла уйланығыҙ әле: улар кеше ғүмерҙәрен ҡотҡарыу өсөн үҙҙәренең сәләмәтлеген һәм ғүмерен аямай алғы һыҙыҡта, коронавирус менән көрәштең уртаһында ҡайнай...

Ирекмәндәрҙең хеҙмәтен дә ба­һалау мөһим: улар ҙа бер нимәгә ҡа­рамаҫтан, оло йәштәгеләргә, мох­таждарға ярҙамға килергә һәр саҡ әҙер. Иң мөһиме – инфекция тарал­маһын һәм ҡорбандар һаны артма­һын өсөн аҙ ғына түҙергә, өйҙә торор­ға кәрәк. Шуны онотмаһағыҙ ине.

Әлеге ваҡытта аяуһыҙ сирҙе туҡ­татыуҙың төп юлы – арала­шыуҙарҙы сикләү, ҡурсаланыу режимын һаҡлау. Көндәр йылыныу менән, әлбиттә, һәммәбеҙҙең тышҡа сығаһы, аралашаһы, иркенләп йөрөгөһө килә. Әммә әлегә был ғәмәл үтә хәүефле.

Рәсәй Һаулыҡ һаҡлау министр­лығының баш пульмонологы, медицина фәндәре докторы, профессор Сергей Авдеев был хаҡта бына нимә ти: “Ҡурсаланыу иғлан ителеүгә ҡа­рамаҫтан, коронавирус йоҡтороу­сылар һаны арта: тәүлегенә меңдәрсә кеше! Май байрамында үҙизо­ля­циялауҙы һаҡлау беҙгә ауырыуҙың тиҙ таралыуын сикләргә, медицина ресурстарын тигеҙ һәм планға ярашлы тотонорға ярҙам итәсәк”.

Йәшерене юҡ: күптәр өйҙә оҙайлы ваҡыт ултырып арыны һәм хатта коронавирус барлығына шикләнә башланы. Әммә был – ҙур хата! Был сир бик алама, ул ҡәҙимге респиратор инфекцияларынан айырыла һәм кешене тиҙ арала юҡҡа сығарыуы ихтимал. Был хаҡта коронавирус инфекцияһын кисергән кешеләр ҙә белдерә.

Мәҫәлән, пациент В. әйтеүенсә, уның тән температураһы тәүҙә 38-гә тиклем күтәрелгән, унан 40 самаһына еткән, бер нисек тә төшөрөп булма­ған... Дауаханала В.-ны үпкәне яһал­ма елләтеү аппаратына тоташтыр­ғандар.

“Был – ҡот осҡос осор. Коронавирус – үтә хәүефле, мәкерле сир. Табиптарға рәхмәт: ғүмеремде ҡотҡарып алып ҡалдылар. Әммә башҡаларға еткерәһем килә: үҙе­геҙҙе һәм яҡындарығыҙҙы һаҡ­лағыҙ, үҙизоляциялау режимын боҙмағыҙ. Был фәҡәт дөйөм хәүеф­һеҙлек өсөн!” – ти үлем тырнағынан ҡотолған пациент.

Ҡурсаланыу режимын һаҡлау ни тиклем мөһим икәнлеген ил Президенты Владимир Путин да Рәсәй халҡына мөрәжәғәт иткәндә телгә алды, әгәр ҙә бәғзе кешеләр шәхси иркен башҡаларҙың хәүефһеҙлеге­нән юғарыраҡ ҡуя икән, тимәк, башҡаларҙың ғүмеренә хәүеф менән янай, тине. Был осраҡта ирек яуапһыҙлыҡҡа әүерелә. Шуға күрә, йәмәғәт, тағы аҙ ғына сабыр итәйек, бер-беребеҙгә иғтибарлы һәм ихтирамлы булайыҡ, коронавирустың ҡорбандары рәтен артабан тулылан­дырыуға юл ҡуймайыҡ.