Баһа биреүҙә ҡатнашығыҙ!

Башҡортостандың Торлаҡ һәм төҙөлөштө күҙәтеү буйынса дәүләт комитеты квартал һайын күп фатирлы йорттарға идара иткән ойошмаларҙың эшмәкәрлек һөҙөмтәлелеге рейтингын яңырта.

Унда мөрәжәғәттәр буйынса тикшереүҙәр күләме, төҙөлгән протоколдар, күрһәтмәләр һаны, шуларҙың үтәлмәгәндәре, компанияларҙың “Асыҡ диалог” акцияларында ҡатнашыуы, ресурстарҙы һаҡлау ойошмалары алдында бурыстың булыу-булмауы, шулай уҡ күп фатирлы йорттарҙа йәшәгән халыҡҡа хеҙмәт күрһәтеүгә, йылдам эш итеүгә, эшмәкәрлектең асыҡлығына, итәғәтлелеккә биргән баһа иҫәпкә алына. Әле дәүләт комитеты, Дәүләт идараһының һанлы үҫеше министрлығы башланғысы менән хеҙмәтләндереүҙе баһалау йәһәтенән махсус программа төҙөлдө. Уның менән түбәндәге һылтанма буйынса танышырға мөмкин: https://uk02.bashkortostan.ru/.

Күп фатирлы йортта милексе булған һәр кеше үҙҙәренең идарасы ойошмаһы эшенә баһа бирә ала. Торлаҡты һәм төҙөлөштө күҙәтеү буйынса дәүләт комитетынан белдереүҙәренсә, рейтинг граждандарҙа ла, идарасы компанияларҙа ла, урындағы үҙидара органдарында ла ҡыҙыҡһыныу тыуҙыра. Граждандар үҙҙәренең йортонда эшләгән идарасы компанияның күрһәткестәрен башҡаларҙыҡы менән сағыштыра, рейтингта аҙаҡҡы урындарҙы яулаған ойошманы алмаштыра йәки йортҡа бүтән төрлө идара итеү алымын һайлай ала.

Был рейтинг идарасы компанияларҙы үҫтереүгә, уларҙың эшен камиллаштырыуға этәргес бирә. Дәүләт комитеты иһә үҙ сиратында күрһәткестәре түбән булған ойошмаларға ҡарата сара күрә.

Торлаҡ һәм төҙөлөштө күҙәтеү буйынса дәүләт комитеты күп фатирлы йорттарҙа йәшәгән кешеләрҙе рейтингты төҙөүҙә ҡатнашырға саҡыра.

Фото: zhilstroynadzor.bashkortostan.ru