+20 °С
Болотло
Йәмғиәт
21 Май 2020, 16:30
“Һөт кухняһы”ның күсмә пункттары эшләй
"Әлбиттә, бик уңайһыҙ була торғайны. Шуға күрә "Һөт кухняһы" продукцияһы менән машина килә тигән яңылыҡты ҡыуанып ҡабул иттек".
Ошо көндәрҙә Нефтекама ҡалаһында һәм Краснокама районында төпкөл биләмәләрҙе һөт ризыҡтары менән тәьмин итеү өсөн күсмә “Һөт кухняһы” эшләй башланы.
Аҙыҡ-түлекте махсус термоконтейнерҙарҙа ташыйҙар. Бындай һауыттар ҡулай температураны һаҡлай һәм ризыҡты сифатлы килеш ҡулланыусыға еткереү мөмкинлеген бирә. Автомобилдәр Әмзә, Энергетик, Арлан, Ҡуян ауылдарынан үтә.
"Әле был биләмәләрҙә льготалы категорияға ингән 24 бала һөт, кефир, эремсек ала. Ризыҡтарҙы тапшырыу пунктын алмаштырыу йәһәтенән ҡулланыусыларҙан ғаризалар ҡабул итәбеҙ. Әлегә тиклем һөт продукттарын яҡындағы ҙурыраҡ ауыл-ҡалаларҙағы стационар пункттарҙан алған кешеләр, ғариза яҙып, уларҙы күсмә пункттарҙан алыу мөмкинлегенә эйә", – тине Башҡортостандың Сауҙа буйынса дәүләт комитеты рәйесе Алексей Гусев.
Ғаризаны әүәлге пунктта йәки яңы адрес буйынса ризыҡты таратҡан мәлдә тапшырырға була.
"Элегерәк һөт ризыҡтарын алыу өсөн беҙгә 30 саҡрым юл үтеп, Энергетик ауылынан Нефтекамаға йөрөргә тура килә ине, – ти Елена исемле ҡатын. – Әлбиттә, бик уңайһыҙ була торғайны. Шуға күрә “Һөт кухняһы” продукцияһы менән машина килә тигән яңылыҡты ҡыуанып ҡабул иттек".
Күсмә пункттың аныҡ маршрутын һәм ваҡытын milkrb.ru сайтындағы “Яңылыҡтар” бүлегендә, шулай уҡ “Һөт кухняһы”ның “Бәйләнештә” селтәрендәге (https://vk.com/mkukhnyarb) һәм Инстаграмдағы (https://www.instagram.com/molochnayakukhnyarb/) рәсми аккаунттарында белергә була.
Фото: vk.com
