+20 °С
Болотло
Йәмғиәт
7 Сентябрь 2020, 06:30
Өфөнө бейектән ҡарай аласаҡһығыҙ
12 сентябрҙән ғәҙәти экскурсиялар башланасаҡ. Уға билетты урында һатып алырға мөмкин буласаҡ.
Өфөлә ике ҡатлы экскурсия автобусы юлға сыҡты. Баш ҡала халҡына һәм ҡунаҡтарға бына шундай яҡшы мөмкинлек булдырылды.
Республиканың Туризм буйынса дәүләт комитеты вәкиле Раил Мөхәмәтйәнов был автобустың өфөләргә һәм туристарға оҡшарына ышана. "Автобус сәғәт ярымда 12-15 километр юл үтәсәк. Ул "Ҡунаҡһарай"ҙан ҡуҙғалып китәсәк, шунда уҡ килеп туҡтаясаҡ. Иҫке Өфөнөң тарихи урамдары, Ағиҙел йылғаһының төҙөкләндерелгән яры буйлап уҙасаҡ", - ти ул.
Өфө ҡалаһының почетлы граждандары экскурсия автобусының тәүге пассажирҙары булды. Шулай уҡ республиканың күп балалы ғаиләләре өсөн ике рейс ойошторолдо. Уларҙы профессиональ гидтар оҙатып йөрөнө. Бындай социаль экскурсиялар 11 сентябргә тиклем дауам итәсәк. Уларға инвалид һәм етем, ата-әсә ҡарауынан мәхрүм балаларҙы, коронавирусҡа ҡаршы көрәштә медицина хеҙмәткәрҙәренә ярҙам иткән ирекмәндәр, Чернобыль аварияһы эҙемтәләрен бөтөрөүселәрҙе саҡырасаҡтар.
12 сентябрҙән автобус ғәҙәти экскурсияларҙы тәьмин итә башлаясаҡ. Уға билетты урында һатып алырға мөмкин буласаҡ.
Автобус көн һайын "Ҡунаҡһарай"ҙан туҙғалып китеп, Ленин, Карл Маркс, Кирова, Мәжит Ғафури, Зәки Валиди, Туҡай, Совет, Пушкин, Сочи урамдары, Ағиҙелдең яр буйы буйлап йөрөйәсәк. Уның ҡабырғаһын «Terra Bashkiria» логотибы биҙәй. Эсендә 59 ултырыу урыны бар, икенсе ҡатының асыҡ өлөшөндә - 29, быялалы өлөшөндә 14 кеше урынлаша ала.
