+21 °С
Болотло
Йәмғиәт
13 Сентябрь 2020, 11:15
Стәрлетамаҡ – Салауат юлы төҙөкләндерелә
Ҡала хакимиәте водителдәрҙән тиҙлек тәртибен үтәүҙе, юл техникаһы эшенә ҡамасауламауҙы, һаҡ һәм иғтибарлы булыуҙы һорай.
Рәсәй Президенты Владимир Путиндың май указы менән раҫланған “Хәүефһеҙ һәм сифатлы автомобиль юлдары” милли проектына ярашлы, Стәрлетамаҡ районында юлды капиталь төҙөкләндереү дауам итә.
Стәрлетамаҡ – Салауат трассаһы республикалағы иң мөһим транспорт артерияларының береһен тәшкил итә. Ул Башҡортостанда ҙурлығы буйынса икенсе һәм өсөнсө урынды биләгән ҡалаларҙы бер-береһе менән тоташтыра. Көн һайын был юлдан меңдәрсә автомобиль үтә. Тимәк, юл инфраструктураһына һәм юл япмаһына ғәйәт ҙур көсөргәнеш төшә.
Быйыл йәй юлдың 34–37-се километрында асфальттың тәүге ҡатламы түшәлгән. Әле иһә Стәрлетамаҡ юл ремонтлау-төҙөү идаралығы юғары фракциялы ҡырсын ҡушылған асфальт-бетон ҡатнашмаһының өҫкө ҡатламын түшәй башланы. Был ҡатнашманың сифаты юғары баһалана.
Ҡала хакимиәте автомобиль хужаларынан тиҙлек тәртибен үтәүҙе, юл техникаһы эшенә ҡамасауламауҙы, юлда һаҡ һәм иғтибарлы булыуҙы һорай.
Фото: transport.bashkortostan.ru
