“Башҡортостан” гүзәле”

Мин – Нурзилә Усманова. Бөрйән районының Әбделмәмбәт ауылынанмын. Башҡорт дәүләт университетын уңышлы тамамлап, әле Башҡорт­остан юлдаш телевидениеһының “Бәхетнамә” тапшырыуында мөхәррир һәм алып барыусы булып эшләйем.

Мәктәп, студент йылдарынан һәр сарала даими ҡатнаштым. Икенсе курста уҡығанда “Һылыуҡай” республика матурлыҡ бәйгеһендә үҙемде һынаным, өсөнсө курстан “Юлдаш плюс” интернет йәштәр радиоһында эшләй башланым. Шиғыр, хикәйә, мәҡәләләр яҙам. Ижад емештәрем йәш шағирҙар йыйынтығында баҫылды. Быйыл “Ҡош юлы” республика бард конкурсында шиғриәт номинацияһында икенсе урынды яуланым. Сәнғәткә булған һөйөү 19 йәшемдә бейеү донъяһына алып килде. Шул осорҙан алып “Guzal-dance” ансамблендә шөғөлләнәм. Хәҙер сәхнә, бейеү – тормошомдоң айырылғыһыҙ өлөшө.

Үҙемде төрлө яҡлап үҫтерергә тырышам, китаптар уҡыйым, йога менән шөғөлләнәм, сәйәхәт итергә яратам. Һәр мәлдең ҡәҙерен белергә, донъяның бар матурлығын күреп, лайыҡлы йәшәргә ынтылам.

Бәйгелә һынау тотор өсөн тү­бәндәге талаптарҙы үтәү мөһим: милли колоритлы, матур, сифатлы фото­һүрәтегеҙ менән бергә үҙе­геҙҙең ҡайһы ҡала, район, төбәктә тыуып үҫеүегеҙ, яратҡан шөғө­лөгөҙ, ҡаҙаныш­тарығыҙ тураһында хат яҙып ебәрегеҙ.

Беҙҙең электрон адрес:

bashkortostan.gazeta@mail.ru

1-се турҙа һылыуҡайҙар үҙҙәре менән таныштыра.

2-се турға сығыусылар интернет киңлектәрендә тауыш йыясаҡ.

Финалға үтеүселәрҙе абруйлы жюри ағзалары баһалаясаҡ. Интернет киңлектә­рендә иң күп тауыш йыйған ҡыҙ “Интернет һылыу­ҡайы” номинацияһында билдә­ләнәсәк.

Конкурсҡа декабрь айында йомғаҡ яһаласаҡ һәм фото­бәйгелә еңеүсе ҡыҙҙың фотоһы гәзит календарын биҙәйәсәк.