Подъездары көлөп тора

Программаға ярашлы, подъ­ездарҙы ремонтлауҙан тыш, унда йәшәүселәргә ихаталарын төҙөклән­дереү мөмкин­леге лә бирелә. Билдәле булыуынса, подъездар республика һәм муниципаль ҡаҙна аҡсаһы иҫәбенә ремонтлана. Йорт­тарҙың идарасы компаниялары фатирҙарҙа йәшәүселәрҙән сығым­дар талап итмәй. Ай һайын ремонт өсөн түләп барған аҡсаны торлаҡ милекселәре икенсе юҫыҡта тотона ала. Мәҫәлән, ихаталағы юлдарҙағы соҡорҙарҙы ямауға йә иһә автомо­бил­дәр ҡуйыу урындары булдырыуға ебәрергә мөмкин. Ҡала хакимиәте етәкселеге фатир хужаларына йыйыл­ған аҡсаны идарасы компания менән берлектә дөрөҫ йүнәлешкә ебәреү сараларын күрергә тәҡдим итә. Мөмкинлектән файҙаланып, һәр йорт подъездарҙы ла, ихаталарҙы ла төҙөкләндерә ала.

Быйыл Сибай ҡалаһында 36 подъезды рәткә килтереү планы алынған. Әле шуларҙың 25-е әҙер, ҡалған­дарында эштәр дауам итә. Йыл башынан ҡала буйынса бар­лығы 54 подъезды ремонтлау ҡа­рала, әммә коронавирус инфекцияһы был тәң­гәлдә лә үҙ эҙен һалмай ҡалмай, күп ҡатлы йорттарҙағы подъездарҙы комплекслы ремонтлау эштәре ҡайтанан һайлап алына һәм ремонт талап иткәндәре генә ҡалдырыла.

Әле ҡаланың Маяковский ура­мындағы 31-се һәм 33-сө йорттарында “Жилсервис” яуаплылығы сикләнгән йәмғиәте эшселәре подъездарҙа косметик ремонт эш­тәрен башҡара. Мәҫәлән, балта оҫтаһы Сәлимйән Айытбаев, сте­наларҙы тигеҙләп, буярға әҙерләй, ә штукатур-малярҙар Анюта Ниғмәтуллина менән Гөлнара Рафиҡова уларҙы тиҙ арала ағартып та сыға. Эшселәр үҙҙәренең хеҙмә­тенә ҙур яуаплылыҡ менән ҡарай. “Беҙ эшләгән подъездар был йортта йәшәүселәргә ҡыуаныс килтерһә, бик шатбыҙ, шуға күрә күп осраҡта сағыу төҫтәр ҡулланырға тырыша­быҙ. Фатирҙа йәшәүселәрҙең дә төрлөһө бар, кемдер беҙҙең эште күреп һоҡлана, ҡайһылары улар өсөн бер аҙ мәшәҡәт тыуҙырғаныбыҙ өсөн әрләп тә китә”, – ти эшселәр.

Улар бер үк ваҡытта электр үткәргестәрҙең төҙөклөгөн тикшерә, кәрәк булһа – төҙәтә лә. Шулай уҡ тәҙрәләр, ишектәр ҙә ремонтлана.

Сибай ҡалаһында киләһе йылда был программа нигеҙендә күп фатирлы 39 торлаҡ йорттоң подъездарын ремонтлау планлаштырыла.

Сибай ҡалаһы.