“Башҡортостан” гүзәле”

Мин Гөлдәр Фәнүр ҡыҙы Смаҡова булам. Ауырғазы районының данлыҡлы Мораҙым ауылында 1999 йылда донъяға килгәнмен. Әлеге ваҡытта Өфө медицина колледжының IV курсында белем алам.

Шөғөлдәрем төрлө: бейергә бик яратам, башҡорт, һинд бейеүҙәрен яратып башҡарам. Колледж тормошонда, район, республика сараларында әүҙем ҡатнашып, призлы урындар яулайым. “Ауырғазы һылыуы-2016” район конкурсында Гран-приға лайыҡ булдым. “Һылыуҡай-2018” республика телевизион гүзәллек бәйге­һендә “Өмөт һылыуҡайы” номинацияһында еңеү яуланым. Зәңгәр экран­дарҙа “Туған тел” телеканалында “Муз-баҙар” тапшырыуын алып барам.

Шиғриәткә ғашиҡмын. Яҡта­шым, Салауат Юлаев исемен­дәге дәүләт премияһы лауреаты, шағир Рәшит Назаровтың ижады күңелемә яҡын. Бәләкәй кластарҙан уҡ мәктәптә шиғыр бәйгеләрендә ҡатнашып, алдынғы урындар яулайым. “Тере һүҙ-2020” бәйгеһендә өсөнсө урын алдым.

Спорт менән мауығам. Йүгереү, баскетбол, волейбол уйындары бик оҡшай. Беше­рергә, тәбиғәт кү­ре­нештәрен фотоға төшөрөргә яратам. Ҡул эштәре менән шөғөл­лә­нергә әүәҫмен. Буш ваҡытым булыу менән бәйләмгә ултырам. Башланғыс кластарҙан уҡ хеҙмәт дәрестәрен көтөп ала торғайным. Сигергә лә, тегергә лә, бәйләргә лә өйрәттеләр беҙҙе. Ғәҙәттә, мин байрам­дар­ҙа өләсәйемә, әсәйемә үҙем­дең ҡул эштәрен бүләк итәм.

Ғаиләлә алты кешебеҙ: атайым, әсәйем, өләсәйем һәм ике апа­йым. Улар һәр башланғыс эше­мә көс-ҡеүәт өҫтәп, дәртләндереп тора.

Яҡындарым менән бергә урманда йөрөргә, тауға менергә, сәскә, дарыу үләндәре һәм еләк-емеш йы­йырға яратабыҙ. Улар мине тә­биғәтте һөйөргә, уның байлыҡ­тарына һаҡсыл ҡарарға өйрәтте.

Һәр йәш кеше кеүек, мин дә яҡты хыялдар менән йәшәйем. Колледжды уңышлы тамамлап, һуңынан юғары белем алып, һайлаған һөнәрем буйынса яҡшы белгес булғым килә.

“Һәр ваҡыт кешеләргә яҡтылыҡ өләшеп, гел алға барырға!” тигән тормош девизы менән йәшәйем. Ысынлап та, алға ынтылһаң, тырышһаң, юлда осраған барлыҡ ауырлыҡтарҙы ла еңеп, үҙ маҡсатыңа өлгәшәһең.

Бәйгелә һынау тотор өсөн тү­бәндәге талаптарҙы үтәү мөһим: милли колоритлы, матур, сифатлы фото­һүрәтегеҙ менән бергә үҙе­геҙҙең ҡайһы ҡала, район, төбәктә тыуып үҫеүегеҙ, яратҡан шөғө­лөгөҙ, ҡаҙаныш­тарығыҙ тураһында хат яҙып ебәрегеҙ.

Беҙҙең электрон адрес:

bashkortostan.gazeta@mail.ru

1-се турҙа һылыуҡайҙар үҙҙәре менән таныштыра.

2-се турға сығыусылар интернет киңлектәрендә тауыш йыясаҡ.

Финалға үтеүселәрҙе абруйлы жюри ағзалары баһалаясаҡ. Интернет киңлектә­рендә иң күп тауыш йыйған ҡыҙ “Интернет һылыу­ҡайы” номинацияһында билдә­ләнәсәк.

Конкурсҡа декабрь айында йомғаҡ яһаласаҡ һәм фото­бәйгелә еңеүсе ҡыҙҙың фотоһы гәзит календарын биҙәйәсәк.