“Ауыл бизнесмендары”

Наилә менән Хәсән Илбуловтар – ауылда йәш һәм матур ғаилә­ләрҙең береһе. Улар башлыса мал иҫәбенә йәшәй, шуға күрә күпләп мал, ҡош-ҡорт аҫрайҙар. Йорт хужабикәһе көндәлек аҡты эш­кәртеп өлгөртә, әсәһе уны баҙарға алып сыға. “Бер-береңә ярҙам иткәндә, йәшәүе лә рәхәт, эшең дә алға бара”, – ти улар.

– Йәй етеүен түҙемһеҙлек менән көтөп алам, – тип һүҙ башланы Наилә ханым. – Бизнесымды еләк йыйып һатыуҙан башлап, бәшмәк менән тамамлап ҡуям. Хәҙер балалар ҙа ярҙамлаша, көнөнә бергә­ләшеп 7-8-әр биҙрә еләк йыйып, Сибайға алып барып һатып ҡайт­ҡан мәлдәр ҙә була. Һатыу менән генә булышмайбыҙ, үҙебеҙгә етәр­лек ҡайнатма, компот, йәшелсәнән төрлө салаттар яһайбыҙ. Ҡыш­ҡылыҡҡа әҙерләгән ризыҡтарҙы баҙҙа урынлаштырырға ла урын ҡалмай. Ҡыш, бигерәк тә Яңы йыл байрамы алдынан, әҙерләгән әйберҙәребеҙҙе баҙарға алып сығабыҙ. Халыҡ яратып һатып ала, тоҙланған ҡыярҙарға яҙ башында һорау күп булһа, бәшмәктәр ҡышын да “һә” тигәнсә үтә.

“Урман бүләген” йыйыу еңелдән түгел икәнлеген еләк-емешкә, бәшмәккә йөрөүселәр яҡшы беләлер, моғайын. Был шөғөл шулай уҡ етеҙлек, оҫталыҡ талап итә, етмәһә, көндәлек табышыңды ҡалаға алып барып һатырға ла кәрәк, шунһыҙ уның йәме юғала. Былтыр ҙа, быйыл да ғаилә балаларын мәктәпкә кейем-һалым, уҡыу кәрәк-ярағы һатып алыу өсөн емеш-еләк һатыуҙан килгән аҡсаны тотонған. Балалар бәләкәйҙән үҙ­ҙәре лә ата-әсәһенә, өләсә­ләренә ярҙамлашҡанға күрә, аҡсаның ҡәҙерен белеп үҫә. Ә улар ғаиләлә дүртәү – ике ҡыҙ һәм ике ул.

Ҡыҙының һүҙенә ҡеүәт өҫтәп, һөйләшеүгә Зәйниза Уйылдан ҡы­ҙы ла ҡушыла: “Ауылда ялҡау­лан­маһаң, бынамын тигән йәшәргә бу­ла. Кейәүем дә, ҡыҙым да бик уңған. Киләһе йыл өр-яңы йорт тө­ҙөргә уйлайҙар, уныһы ла булыр. Тик Хоҙай сәләмәтлекте бирһен”, – ти.

Әсәле-ҡыҙлы “ауыл бизнесмендары” көҙгө урмандан күҙҙең яуын алыр ҡып-ҡыҙыл балан йыйып ҡайтҡанда, ҡомалаҡҡа тап булған. Тиҙҙән улар йәнә урманға ҡомалаҡ йыйырға барырға йыйына. Ә ҡома­лаҡ икмәген бешереүселәр уларға алдан уҡ заказ биреп тә ҡуйған.

Бына шундай көндәлек мәшә­ҡәттәр менән мәж килә Иҫәнбәт ауылы “бизнесмендары”.