Эшмәкәрлектәре – тормоштоң ныҡлы нигеҙе

Тарихтан билдәле булыуынса, 1764 йылдың 18 февралендә императрица Екатерина II “Өфө – Ырымбур трактын төҙөү тураһын­да”ғы указ сығара. Был юл нәҡ Талбазы ауылы аша үтә. Уны хеҙмәтләндереүгә яҡын-тирәлә йәшәгән халыҡты йәлеп итәләр. Республикала райондар ойош­торолғас, Ауырғазы район советы ҡарамағында төбәктә тәүгеләрҙән булып юл бүлеге барлыҡҡа килә.

Үткән быуаттың 30-сы йылдарында районда юл төҙөлөшө әү­ҙем­ләшә. Был мөһим эштә хеҙмәт­кә яраҡлы бөтә халыҡ ҡатнаша. Кү­мәк тырышлыҡ менән Талбазы – Дәүләкән, Талбазы – Семенкино, Талбазы – Аҡкүл һәм башҡа урын­дағы юлдар төҙөлә. Ә инде 70-се йылдар ил һәм республика тарихына юлһыҙлыҡты бөтөрөү осоро булып инә. Был дәүерҙә колхоз үҙәк­тәре төбәк биләмәһе аша үткән әлеге тарихи магистраль һәм район үҙәге менән тоташтырыла. Ишле – Атйетәр, Мостафа – Софья (Ғафури районы), Аҡкүл – Нуғаҙаҡ, Урал – Мораҙым юлдары шул йылдарҙа барлыҡҡа килә. Ғөмүмән, ул саҡта районда юл селтәрен тө­ҙөү, республиканың башҡа төбәк­тәре менән сағыштырғанда, заманына ҡарата бик тә ҡоласлы бара, бының йәшәйештәге әһәмиәте тәү башлап Ауырғазы ерендә раҫлана.

Тарихи ысынбарлыҡ бөгөн дә көнүҙәк булып ҡала. Юлдар – тормош артерияһы, тип юҡҡа ғына әйтелмәй бит. Ауырғазылар иһә үҙҙәренең ошо тарихына тоғролоҡ һаҡлай. Был уларҙың юл хужалығы тармағын үҫтереүҙә һәр саҡ алдынғылар рәтендә булырға ынтылышында асыҡ сағыла.

Предприятие ҡарамағында 530 километр оҙонлоғондағы юл сел­тәре иҫәпләнә. Уны ҡараулы, тәр­типтә һәм төҙөк тотоу, юл ҡорол­маларының бөтөнлөгөн һаҡлау, хәрәкәт именлеген тәьмин итеү ҙур көс һәм тырышлыҡ талап итә. Хәҙер техника ағымы көслө, юл­дарға ҙур көсөргәнеш төшә. Уларҙы яңыртып, төҙөкләндереп тор­ғанда ғына хеҙмәт итеү ваҡы­тын оҙайтып була. Һуңғы тиҫтә йыл­да предприятие үҙ көсө менән Талбазы – Семенкин, Урал – Мораҙым, Культура – Төрөмбәт автомобиль юлдарын тулыһынса реконструкция­лауға өлгәшкән.

Ғәмәлдәге юлдарҙы ремонтлау, ҡала һәм ауыл биләмәләрендә яңы юлдар төҙөү буйынса күләмле эш башҡарғандар. Мәҫәлән, быйыл ғына Үтәймулла, Ҡорманай, Шланлы ауылдарында урамдар, шулай уҡ район биләмәһендә төҙөлөп килгән ике фельдшер-акушерлыҡ пункты биләмәләрендә асфальт һалғандар. Бер үк ваҡытта бер нисә ауылда урам юлдары күтәртелгән.

Юлдарҙы сифатлы итеп төҙөүгә һәм төҙөкләндереүгә коллективта һәр кем тырышлыҡ һала. Бында 60 кеше эшләй. Кадрҙар тотороҡло, улар бөгөн тармаҡтағы бөтә эш комплексын да башҡарырлыҡ бе­лем­гә һәм тәжрибәгә эйә. Икен­сенән, техника паркының ҡеүәтле булыуы эш сифатына ла, тиҙлегенә лә ыңғай йоғонто яһай. Техника паркы йылдан-йыл яңыртыла һәм тулы ҡеүәтенә файҙаланыла.

Үткән йылда ғына өс берәмек яңы техника килтергәндәр. Пред­приятиеның уңышлы эшмәкәрлеге етәксенең идара итеү оҫталығына бәйле. Коллектив был яҡлап һәр замандарҙа ла уңды. Һуңғы өс тиҫтә йыл дауамында идаралыҡҡа исеме тармаҡта билдәле абруйлы шәхес Риф Рафиҡов етәкселек итте. Уның етәкселегендә пред­прия­тиеға иҡтисади көрсөк йылдарын да, конкурентлыҡ һынау­ҙарын да үтергә тура килде. Әммә Риф Ғилмулла улы үҙенең етәксе­лек оҫталығы менән предприятиены тотороҡло үҫеш юлына сыға­рыуға өлгәште. Быйыл лайыҡлы ялға сыҡҡанда үҙенә әҙерлекле алмаш ҡалдырҙы. Бөгөн пред­прия­тиеға йәш етәксе Артур Фәйзуллин идара итә.

Артур Яхъя улы әлегәсә район­дың “Архитектура-төҙөлөш бүлеге” муниципаль бюджет учреждениеһы начальнигы булып эшләгән. Артур Фәйзуллинға коллектив ныҡлы ыша­ныс бағлай, сөнки уның тамыр­ҙары ошо ерҙә. Юл комплексы тар­мағы заман һәм йәштәр ме­нән бергә үҙгәрә. Донъя кимәлен­дәге юлдар һалыу – йәштәрҙең көслө иңендә.

Быйылғы хеҙмәт йылы инде тамамланыуға бара. Идаралыҡ коллективы уны уңышлы теүәлләп, киләһе йылда эш күләмен тағы ла арттырырға ниәтләй, сөнки бының өсөн бөтә мөмкинлектәр бар.

Ауырғазы районы.