Хеҙмәте менән хөрмәтле

Ғүмер буйы кешеләргә изгелек ҡылыу – уның йәшәү мәғәнәһенең бер сағылышы. Бөгөнгө геройыбыҙ тормошонда нәҡ ошо сифаттарҙан ҡәнәғәтлек һәм бәхет тапҡан. Медицина өлкәһендә 51 йыл хеҙмәт иткән, эшен мөкиббән яратып башҡарған, күңел йылыһын өләшкән Сәриә Лотфулла ҡыҙы Абдулова хаҡында һүҙем.

Мин уны бала саҡтан беләм: бер мәк­тәп­тә уҡыныҡ. Сәриә тырыш, өлгөр, яҡшы уҡыусы, пионер, комсомол ойошма­лары­ның әүҙем ағзаһы ине, әммә бәләкәйҙән табип булырға хыялланғанын күп йылдар үткәс кенә төшөндөм, сөнки ул заманда бер-беребеҙҙе күреп-белеп йөрөгән таныштар ғына инек. Тормош юлдары һуңы­нан ғына осраш­тырҙы, яҡындан аралаша башла­ныҡ. ... Атаһы Лотфулла ағай, бәлә­кәс кенә Сәриәне тубыҡтарына ултыртып: “Ҡыҙым доктор була”, – тип һөйгәне абруйлы табиптың бө­гөнгөләй хәтерендә. Яҡыны бала­һының киләсәген дөрөҫ юра­ғандыр, сөнки ете йәшлек ҡыҙ баланың ауы­лын­дағы күҙенә сүп төшөп, бә­ләгә тарыусыларға ярҙам итә алыуы ғәжәп хәл бит.

Ауыл фельдшеры халыҡ өсөн төп белгес, хатта табип булыуы бер кемгә лә сер түгел. Ағиҙел буйында урынлашҡан әллә ни ҙур булмаған Мөҡсин ауылының аҡ халатлы фельдшеры Минира апайҙы Сәриә бәләкәйҙән үк ҙур доктор тип ҡабул иткән, уның эшләгәнен күҙәтергә яратҡан. “Минең дә Минира апай һымаҡ доктор булғым килә”, – тип йөрөгән ул. Ниәт иткән – мора­ҙына еткән, ти бит ололар. Урта мәктәпте тамамлағас, күҙ дауалаусылар курсында (элек шундай курстар булған) уҡыған.

Ул йылдарҙа халыҡ араһында йоғошло трахома ауырыуы киң таралған. Йәш белгес, ең һыҙғанып, ауылда күҙ дауаларға, трахомаға ҡаршы көрәшкә тотона. Уның ҡара­мағында 60 пациент иҫәпләнә. Был ваҡытта Өфөлә табип булып эш­лә­гән бер туған Факил ағаһы менән Гөлнур еңгәһе Сәриәне Республика клиник дауаханаһына саҡырып ала. Ҡулында әлегә дипломы булмаған ҡыҙ ихлас ҡабул итә саҡырыуҙы. Рес­публика дауаханаһында санитарка булып эш башлай һәм медицина училище­һына киске уҡыуға инә.

Өс йылдан дипломлы йәш кадр шәфҡәт туташы итеп хирургия бүлегенә эшкә күсерелә. Ә хирург ярҙамсыһының эшен күҙ алдына килтерергә була: төнгө дежур булған саҡтар, бер-бер артлы ҡатмарлы операциялар...

Сәриә Лотфулла ҡыҙы был йылдарҙа белемен артабан камил­лаштырыуҙы дауам итә. Башҡорт­остан дәүләт медицина институтында киске бүлектә белем ала һәм уҡыу йортон яҡшы билдәләр менән тамамлай. Уға вузда дәрес­тәрҙә шөғөлләнеү ауыр булмай, сөнки ғәмәлдә эшләгән кеше була­раҡ, күп нәмә таныш, тик белемде киңәйтергә кәрәк була. Эше­нә яуап­лы ҡараған, ярайһы белем багажы туплап өлгөргән, 23 йыл хеҙмәт стажы булған Сәриә Лотфулла ҡыҙы Өфө ҡалаһының 44-се полик­линикаһына терапевт итеп эшкә саҡырыла.

Ошо учреждениела ул 26 йыл буйы участка табибы вазифаһын башҡара. Был эш еңелдән түгел, ваҡытты күп ала, пациент­тарҙы ҡа­бул итергә, саҡырыу буйынса өйҙә­ренә барырға, документтарҙы тәр­типкә килтерергә – барыһына ла өлгө­рөргә кәрәк. Әйткәндәй, йәш табип­тарҙың ҡайһы берҙәре бындай эш тәртибенә күнә алмай. Был аңлашыла ла: һәр кемдең ғаиләһе, балалары, башҡа мәшәҡәттәре етерлек...

“Участкала йөрөү күп ваҡытты ала, әммә ярҙам итергә тейешһең. Өйҙә ауырып ятыусылар араһында оло быуын кешеләре ярҙамға биге­рәк мохтаж, хәрәкәт итә алмайынса, тик түшәк режимындағылар йөрәкте өҙә. Улар янына тиҙерәк ашығаһың, ҡулдан килгәнсә хәлен еңеләйтергә тыры­шаһың. Утыҙ йылға яҡын бер участкала эшләгәс, ул ус төбөндәге һымаҡ, кемдең ҡайҙа, ни хәлдә йәшәгәнен белеп бөтәһең. Уйлап ҡараһаң, һаулыҡ һағында тороусы­ларҙың хеҙмәте ҡаһарманлыҡҡа тиң түгелме? Эшем – мине, мин эшем­де яраттым”, – ти Сәриә Лотфулла ҡыҙы.

“Һаулыҡ һаҡлау алдынғыһы”, “Башҡорт­ос­тандың атҡаҙанған табибы” кеүек маҡ­таулы исемдәргә лайыҡ булыуы ла – эшенә ҡарата тоғролоҡ билдәһе һәм ғәҙел хеҙмәт һөҙөмтәһе.

Әйткәндәй, бер ғаиләнән өс табип улар: Факил ағаһы, Сажиҙә апаһы һәм үҙе. Еңгәләре лә, ки­лендәре лә – табиптар. Ағаһының, апаһының балалары барыһы ла доктор һөнәрен һайлаған.

Сәриә Лотфулла ҡыҙы тормош иптәше менән ҡыҙ һәм ул тәрбиәләп үҫтергән. “Әсәйебеҙ – кумирыбыҙ”, – тип ғорурлана уның балалары. Йәмилә менән Алишер иһә юрист һөнәрен һайлаған.

...Ярты быуат ғүмер – кешеләргә бағышланған тынғыһыҙ һәм көсөр­гәнешле хеҙмәттә. Ҡылған ғәмәл­дәре өсөн Сәриә Лотфулла ҡыҙы үҙ ғүмерендә бик күп рәхмәт алған, ғәҙел хеҙмәте менән абруй ҡаҙан­ған. Табип күптән түгел хаҡлы ялға сыҡһа ла, элекке пациенттары уға шылтыратып кәңәш һорай, һаман ярҙам көтә. Оло табип өмөтләнгән­дәрҙең һүҙен кире ҡаҡмай: элеккесә ярҙамға ашыға, ярҙам итеүҙе үҙ бу­рысы тип һанай... Ошондай фиҙакәр булмышлы кешеләр менән тормош йәмле.