Бик мауыҡтырғыс булмаҡсы - ҡатнашығыҙ

23-24 октябрҙә уҙасаҡ сара республикала йәшәгәндәр өсөн яңы мөмкинлектәр асасаҡ. Проекттың барлыҡ сараларын да https://festivalrgirgbo.ru/program сайтында тура эфирҙа күрһәтеү ҡаралған. Ғалимдарҙы, сәйәхәтселәрҙе, экологтарҙы, туристарҙы һәм теләге булған башҡаларҙы был үҙенсәлекле фестивалдә ҡатнашырға саҡыралар.

Программаны “Рус география йәмғиәте. Урал һәм Волга буйы төбәктәре” тигән әңгәмә менән асыу планлаштырылған. Уның спикерҙары – М. Аҡмулла исемендәге Башҡорт дәүләт педагогия университеты ректоры Салауат Сәғитов һәм Рус география йәмғиәтенең башҡарма директоры урынбаҫары Сергей Корлыханов.

14.30 – 16.00 сәғәттәрҙә “Евразия мәғрифәтселәре” тигән дискуссия клубы үҙ эшен алып барһа, 5-се яртынан 6-ға тиклем Рәсәйҙең атҡаҙанған сәйәхәтсеһе, туризм буйынса спорт мастеры Олег Лукьянов туризмда хәүефһеҙлек мәсьәләләре буйынса семинар үткәрәсәк. “Барыһы ла - Урал” тигән лекциялар циклы ла бик мауыҡтырғыс булмаҡсы. Уның барышындағы “Башҡортостан ҡомартҡылары – яңы археологик асыштар” , “Башҡортостан Республикаһы тупрағы эволюцияһының заманса мәсьәләләре”, “Геолог менән ял көндәре”, “Башҡортостан мәмерйәләре” тигән саралар ҙа күптәрҙә ҡыҙыҡһыныу уятыр. “Мостай пигы”, “Таштар һәм Һыу”, "Вертикаль – Өфө”, “Рус география йәмғиәте. Бөйөк асыштарға - 175 йыл!” тигән фильмдар ҙа үҙ тамашасыһын тапмай ҡалмаҫ.

Сара тураһында тулыраҡ мәғлүмәт менән https://festivalrgirgbo.ru/program сайтында ентекләберәк таныша алаһығыҙ.

Фото: rasfokus.ru