Хәстәрләүҙән йәм табып йәшәй

Мөҙәрис Сангишев Мә­лә­үез районының Эткөсөк ауылында тыуған. Ҙур ғаиләлә алты малай һәм бер ҡыҙ үҫә. Малайҙарҙың бөтәһе лә, атайҙары Сынтимер бабайҙың кәңәшен тотоп, ауыл хужалығы белгесе булып китә. Һоҡлан­маҫ ерҙән һоҡланырһың: егеттәрҙең алтыһы ла Башҡортостан дәүләт аграр университетын тамам­лаған. Дамир – инженер, Сәғит – агроном, Сабит – зоотехник, Самат – агроном, Мөҙәрис – ветеринар һәм Камил – агроном.

– Атайым “бөтәгеҙ ҙә агроном булмағыҙ, берегеҙ ветеринарға уҡығыҙ” тигәс, ошо һөнәрҙе һайларға булдым һәм бер тапҡыр ҙа үкен­мәнем, – тип һөйләй бөгөн Мөҙәрис Сынтимер улы.

Күңелен биреп һайла­ған һөнәре буйынса юғары уҡыу йортон тамамлағас, 1979 йылда Ленин исемен­дәге колхозда ветеринар бу­лып эш башлай. 1987 йыл­да уны Мәләүез райо­нының ветеринария стан­ция­һына эшкә алалар. Ул дезинфекция отряды начальнигы булып китә. Мө­ҙәрис Сынтимер улы ошо тармаҡта 41 йыл, йәғни ғүмере буйы, бер коллективта эшләй.

– Яҙмышыма һис тә үкенмәйем. Барыһынан да ҡәнәғәтмен. Оҙаҡ йылдар эшләгәс, мине профсоюз ко­митеты рәйесе итеп һайланылар. Был эшемде лә яратам. Хеҙмәткәр­ҙә­ребеҙгә шифаханаға, балаларына лагерға юлламалар юллау, юбиляр­ҙар­ҙы тәбрикләү – мәшәҡәте күп, әммә миңә был хәстәр­лектәр оҡшай. Хеҙмәткәр­ҙәрҙең бар льготаларын һәм ташламаларын иҫәптә тотоп, ғәҙел эшләйем, – ти ул.

Мөҙәрис Сангишев тормошонан һәм эшенән ысын мәғәнәһендә ҡәнәғәт. Уның туған коллективы, эше ту­раһында һөйләгән саҡта күҙ­ҙәренең янып торғанын күрһәгеҙ! Оҙаҡ йылдар бер үк һөнәр буйынса эшләһә лә, ялҡмаған, арып янма­ған, киреһенсә, заман талаптарына яраҡлашып, хеҙмәтен дауам итә.

– Хәҙер замандар үҙгәр­ҙе. Беҙҙең эшмәкәрлектә лә яңы алымдар ҡулла­ны­ла. Мәҫәлән, “Меркурий” сис­темаһында әүҙем эш­ләйбеҙ. Уның буйынса мал­ды чиплайбыҙ, компью­терға иҫәпкә индерәбеҙ, электрон документтар алып барабыҙ. Даими рәүештә яңы махсус кейем, техника алып торабыҙ. Был ыңғай үҙгәрештәр республика ветеринария хеҙ­мәтенә Азат Йыһаншин етәксе булып килгәс башланды. Ауыл ерҙәрендәге ветеринария участкалары ла заманса йыһазлан­дырылды: эш өсөн бүлмә, компьютерҙар ҡуйылды, ял итеү урыны бар. Бер һүҙ менән әйткән­дә, шарттар бик яҡшырҙы. Эшләргә лә эшләргә, – тине ул.

Абруйлы белгес фе­ке­ренсә, эштең алға барыуы, республикала алдынғы станцияларҙың береһе булыуы – коллективтың һәм етәкселектең тырышлыҡ һөҙөмтәһе. Мәләүездә ветеринария хеҙмәте етәксе­һе булып күп йылдар рәт­тән бик аҡыллы, тәжрибәле һәм кешелекле белгес Сергей Ковалец эшләй. Ул туп­лаған коллективтың аныҡ һәм теүәл эшмәкәрлеге арҡаһында район күп йылдар зоологик яҡтан имен төбәктәр иҫәбенә инә. Бында бруцеллез, туберкулез, себер түләмәһе һәм башҡа хайуандарға ҡарата ғына түгел, кешегә лә хәүеф тыуҙырған сирҙәргә ныҡлы кәртә ҡуйылған.

Эшенән ҙур ҡәнәғәтлек алған Мөҙәрис Сынтимер улы – ғаиләһендә лә бә­хетле кеше. Тормош иптә­ше Хафиза Караметдин ҡы­ҙы менән улар ике ма­лайға ғүмер биргән. Яңауыл райо­нынан килен булып төшкән ҡатыны шәфҡәт туташы булып эшләй. Улдары Альберт менән Альфред газ эшмәкәрлегенә бәйле ойошмала эшләй. Улар үҙҙәре лә ғаилә ҡороп, ата-әсәһен олатай-өләсәй итеп бәхетле тормошта йәшәй.

Ошо көндәрҙә абруйлы ветеринар 65 йәшлек юбилейын билдәләй. Уны күр­кәм байрамы менән тәбрик­ләйбеҙ, ныҡлы һаулыҡ, уңыштар теләйбеҙ.

Мәләүез районы.