Теле халыҡсан, ябай

Иҫәнбәт ауылынан Гөлзи­фа Зекрейә ҡыҙы ижад менән мәктәп йылдарынан уҡ шөғөл­ләнә. Бигерәк тә башҡорт, рус теле һәм әҙәбиәтен яратып уҡый, киләсәктә уҡытыусы булырға хыяллана. Әммә уның хыялдары тормошҡа ашмай: ишле ғаиләлә үҫкән ҡыҙға Өфөгә документтарын алып барырға мөмкинлек булмай, ата-әсәһенә ярҙам итеү маҡса­тында, ул эшкә урынлаша.

– Хәтеремдә, мәктәп йылдарында “уҡытыусы булма­һам, туҡыусы булам”, ти торғайным. Үҙемсә, уҡытыусы һүҙенә рифмалаштырып шулай әйткәнмендер. Әммә Хоҙайҙың амин тигән сағына тура килгән, миңә бер нисә йыл туҡыусы булып эшләргә насип итте. Мәктәпте тамам­лаған йылда бер төркөм ҡыҙҙар менән күмәкләшеп Мәскәү ҡалаһы янындағы Иваново туҡыу фабрикаһына эшкә урынлаштыҡ. Бер үҙем 25 туҡыу станогын хеҙмәтлән­дерҙем. Тыуған яғымды һағы­нып кире ҡайттым. Шул осорҙа ла һағыныу кисерештәрен ши­ғыр юлдарына теҙә торғай­ным. Тормошҡа сығып, балалар, ғаилә мәшәҡәттәре менән бер аҙ шиғыр яҙыуымды ситкә ҡуйып торҙом. Бер-бер артлы иң ҡәҙерле кешеләрем – ирем менән улымды юғалтҡас, бар ҡайғымды йәнә аҡ ҡағыҙға теҙҙем, шиғырҙарым күңел йыуанысыма әйләнде. Уларға таянып йәшәй башланым, дәртләнеп ижад иттем. 2018 йылда “Юлдаш” радиоһы конкурсында ҡат­нашып, еңеүсе булдым, халыҡсан шағирә тигән исем бирҙеләр. “Атайсал” гәзитендә тәүге тапҡыр ташҡа баҫылған шиғырҙарым донъя күрҙе. Аҙаҡ таныштарым, шиғырҙарымды үҙ итеүселәр “китап сығарырға кәрәк” тип әйткәс, тәүәккәлләп тотондом. Бер туған Иштуған ағайым бағыусылыҡ ярҙамы күрһәтте, ҡустымдың ҡыҙы уны компьютерҙа йыйып бирҙе. Бына шулай уртаҡ хеҙмәт һөҙөмтәһендә тәүге йыйынтығым донъя күрҙе, –тип таныштырҙы үҙенең ижад юлы менән ауыл шағирәһе.

– Гөлзифа Исрафилова –ауылын­дағы “Һандуғас” фольк­лор ансамбле етәксеһе лә. Тап ул сығарған таҡмаҡ­тарҙы башҡарып, ансамбль райондағы төрлө мәҙәни са­раларҙа призлы урындар яулай. Һуңғы ваҡытта уның йырҙары ла ансамблдең репертуарында ныҡлы урын ала башлаған.

– Ысынлап та, ауыл шағи­рә­һенең теле һутлы, халыҡ­сан, ябай. Һәр шиғырын, һыу­һынды ҡандырырға теләгән­дәй, рәхәтләнеп уҡыйһың. Әйтем-мәҡәлдәрҙе, урындағы һөйләште, төрлө лаҡаптарҙы кәрәкле ерҙә бик оҫта ҡуллана белеүе лә шиғриәтен балҡы­тып ебәрә. Шиғырҙарында бөгөнгө проблемалар ҙа ҡыйыу күтәрелә, тыуған ер, атайсалы өсөн тәрән борсолоуы ижадында асыҡ сағыла.

Тәүге ҡоймаҡ төйөрлө бу­ла, тиҙәр. Ә бына Гөлзифа Исрафилованың беренсе шиғырҙар йыйынтығы – бөтә талаптарға яуап биргән ижад емеше. Киләсәктә лә күңел һандығынан ижад емештә­регеҙ урғылып, баҫылып сығып торһон, яңы китапта­рығыҙ менән һөйөндөрөгөҙ, ябай ауыл шағирәһе!

Баймаҡ районы.