Байрамға арналған саралар бөгөн үк башлана

4 ноябрҙә Рәсәй Халыҡтар берҙәмлеге көнөн билдәләйәсәк. Ошо айҡанлы республикала 3–8 ноябрҙә онлайн тәртиптә саралар ойошторола.

3 ноябрҙә – һөнәри белем биреү ойошмаларында, 5 ноябрҙә дөйөм белем биреү учреждениеларында берҙәм дәрестәр уҙа.

Бөгөн сәғәт 12-лә “#МыВместе” Бөтә Рәсәй асыҡ дәрес үткәрелә. Ул https://открытыеуроки.рф/ сайтында, шулай уҡ Рәсәй Федерацияһының Мәғариф һәм фән министрлығының социаль селтәрҙәге рәсми сайтында күрһәтелә.

3–8 ноябрҙә “Ҙур этнографик диктант” V Халыҡ-ара мәғрифәтселек акцияһы онлайн рәүештә www.miretno.ru сайтында үткәрелә. Диктант яҙыуҙа республиканың мәғариф хеҙмәткәрҙәре һәм дөйөм белем биреү ойошмалары уҡыусылары, колледж студенттары һәм уҡытыусылары ҡатнаша. Сара мәсьәләләре 30 һорауҙан торасаҡ: 20 һорау – бөтәһе өсөн дә һәм 10 һорау төбәккә ҡағылышлы була. Уны яҙыуға 45 минут бирелә. Бөтә эштәрҙе дөрөҫ үтәгән өсөн 100 балл ҡуйыла. Дөрөҫ яуаптар 16 ноябрҙә www.miretno.ru сайтында баҫыласаҡ, ә шәхси һөҙөмтәләр 12 декабрҙә әҙер буласаҡ.

Халыҡтар берҙәмлеге көнөнә арнап мәғариф учреждениеларында класс сәғәттәре, викториналар, интеллектуаль-танып белеү әңгәмәләре, ә мәктәп китапханаларында китап күргәҙмәләре ойоштороласаҡ.

Бөтә был саралар Халыҡтар берҙәмлеге көнөнә һәм Рәсәй тарихын өйрәнеүгә бағышлана.

Фото: kulturarb.ru