“Без – башҡортлар” үҙ эшен дауам итәсәк

“Без – башҡортлар” ойош­ма­һы эшмәкәрлегенең һөҙөмтәләре Бөтә донъя башҡорттары ҡорол­тайы Башҡарма комитетының киңәйтелгән ултырышында, шулай уҡ башҡорт телен үҫтереү һәм һаҡлау маҡсатында бирел­гән гранттарҙы яулаған проекттар күргәҙмәһендә тәҡдим ителде. Республиканың тыуған яҡты өйрәнеүселәре методик әсбаптар – “Без – башҡортлар” брошюралары циклын алды. Баҫмала башҡорттар йәшәгән райондар, төньяҡ-көнбайыш төбәк халҡы һөйләше үҙенсә­лектәре тураһында мәғлүмәт бар. Башҡорт ырыуҙары, шулай уҡ төньяҡ-көнбайыш башҡорт­тары ырыуҙары өсөн махсус карталар булдырылды.

Телдәрҙе үҫтереү мәсьәләһе Башҡортостан Фәндәр акаде­мияһы һәм Стратегик тикшере­неүҙәр институты белгестәре әҙерләгән ғилми сараларҙа сағылыш тапты. Ғилми йәмә­ғәтселек тыуған яҡты өйрәнеү­селәр өсөн барлыҡ кәрәкле мәғлүмәтте еткерергә тырышты, был йәһәттән семинарҙар үткәрелде, улар онлайн тәртиптә социаль селтәрҙәр аша күрһәтелде.

Эйе, был эштә социаль сел­тәрҙәрҙе файҙаланыу ҙур әһә­миәткә эйә булды. “Бәйлә­нештә”ге “Без – башҡортлар” төркөмө әүҙем үҫешә, унда ярты йыл эсендә 1100-ҙән ашыу әүҙем ҡулланыусы йыйылған. Асыҡ төркөм Башҡортостандың төньяҡ-көнбайышында башҡорт телен һәм мәҙәниәтен үҫтереү буйынса фекер алышыу майҙан­сығына әйләнде.

Милләттәштәребеҙ был өлгә­шелгәндәр менән туҡтап ҡалырға йыйынмай. Киләһе йылда ла этнографик тикшереүҙәр дауам итәсәк. Быйыл Туймазы һәм Шаран райондарына ойошторолған экспедицияларҙың һөҙөмтәһе булараҡ, шул яҡтағы кейем үҙенсәлектәре, төньяҡ-көнбайыш башҡорттары көнкүреше Өфөлә үткәрелгән һөнәрмәндәр аҙна­лығында күрһәтелде. Төбәк тарихына арналған күп тикше­реүҙәр архивтарҙа һаҡлана һәм өйрәнеүҙе талап итә.